Војната во Украина предизвика различни нарушувања на пазарот, а едно од нив се однесува на недостигот на јаглерод диоксид, што може да се одрази на производството на пиво и минерална вода.
Поради недостиг на CO2 дури и познатиот производител „Санпелегрино“ во северна Италија неодамна го сопре производството на минерална вода и сода на два дена.
Трошоците за производство на јаглерод диоксид пораснаа
Во Германија пиварите предупредија дека пивото може да поскапи поради недостиг на амонијак за прозводство на јаглерод диоксид. А јаглеродната киселина, исто така, ја нема ни во Австрија, потврди струковното здружение на прехранбената индустрија при Стопанската комора.
„Поради скромните количини трошоците на јаглерод диоксид во последно време многу пораснаа“, велат од австриската Стопанска комора. Главните причини се „пред сѐ високите цени на енергентите, со кои некои производители на јаглерод диоксид веќе не можат да се носат, па го намалија или го сопреа производството“. Ограничени се и производите во кои како нуспроизвод се создава јаглеродна киселина.
Сега постои недостиг на достапни количини јаглероден диоксид на пазарот, кој се корисити, на пример, за производство на пијалаци во Австрија. Ситуацијата со снабдување со јаглероден диоксид во оваа земја е напната, но во моментов го има доволно.
Досега од австриската пивска индустрија нема дојави за недостиг на јаглеродна киселина – дури ни од големите производители, рече деновиве Флоријан Бергер, директор на Австриското здружение на пиварници за „Волксблат“.
Во Германија некои пиварници го запреа производството
Сепак, во Германија има компликации.
Некои компании,како „Aktienbrauerei Kaufbeuren“, веќе престанаа да произведуваат лимонада. Традиционалната пиварница „Riegele“ од Аугсберг, меѓу останатото позната и по „Специ“, исто така се соочува со недостиг и предупредува дека можно е да го сопре производството.
Портпаролот на Здружението за индустриски гасови, потврди за германските медиуми дека недостигот на CO2 е проблем во целата прехранбена индустрија затоа што сите производи мора да се транспортираат изладени – на пример свежата храна – која вообичаено се лади со сув мраз. Но, на производителите за тоа им треба течен CO2 и затоа се подеднакво погодени како и пиварниците.
Јаглеродниот диоксид се користи и во прехранбената индустрија и во медицината
Не е само прехранбената индустрија засегната со недостиг на овој гас: лековите и вакцините се ладат со сув мраз, а во месната индустрија CO2 се користи за заспивање на животните пред колење.
Во земјоделството, индустрискиот гас се користи во стаклениците за поттикнување на растот на билките. Ако продолжи недостигот, тоа може да има далекусежни последици за многу компании.
Причина за недостиг на јаглеродниот диоксид се зголемените цени на гасот. Многу добавувачи на јаглероден диоксид мораа да го намалат производството како резултат на зголемените трошоци.
Според Гунтер Чуту, снабдувачот на неговата пиварница „Aktienbrauerei Kaufbeuren“ морал да ја затвори својата европска фабрика. Место вообичаените 28 тони јаглеродна киселина, колку што собира во магацините во пиварницата, на крајот на август испорачни му се само 7,5 тони. Тоа не е доволно за сите нивни производи. Освен тоа, не се знае кога ќе стигне следната испорака.
„Целиот пазар на јаглероден диоксид е празен“, се пожали германскиот пивар пред новинарите.
„На некои места производството е намалено“, вели портпаролот на Германското здружение за набавка на минерална вода Тобиас Биленштајн. Многу производители во моментот добиваат помалку CO2 од тоа што нарачале.
