Компирот е едногодишна окопна култура, која најдобро успева при одгледување во планински и рамничарски реони и области со умерено влажна клима. Производството на ранен и летен компир се одвива во заштитен простор или на отворено, при што најдобри резултати се постигнуваат на плодни, лесни и добро обработени почви, длабочината и времето на обработка на почвата зависи од типот на почвата, наклонетоста на теренот и климатските услови, со претходно про`ртени здрави и квалитетни семенски клубени. Спрема дожината на вегетацијата, односно времето на созревање сите сорти на компир можат да се поделат на рани (60-80дена), средно рани ( 80-100дена) и доцни т.е касни (100-130дена) сорти. Една од поважните разлики меѓу раните и доцните сорти е тоа што доцните сорти имаат поголема содржина на скроб, поотпорни се на болести и даваат поголеми приноси. Раното садење започнува од 15 март во потоплите јужни подрачја, пролетното од 15 април до 15 мај во рамничарско-континенталниот дел, и летното од 15 јуни до 15 јули.
Садењето во заштитен простор (пластеници и стакленици) овозможува порано производство за 7–15 дена и намален ризик од доцни пролетни мразови. Се применува поголема густина на садење (20–25см во ред и 65–70см меѓу редови) во добро подготвена и наѓубрена почва, и се одбираат сорти со краток период на вегетација. Нагрнувањето се врши при садење или пред никнување. Потребно е навремено откривање на тунелите за да се избегне прекумерен вегетативен раст и појава на болести. Наводнувањето е задолжително особено во случај на пократки сушни периоди во пролет, недостатокот на вода негативно влијае на приносот и квалитетот на клубените. Најдобро е да се користат системи со микрораспрскувачи и „капка по капка“. Вадењето на компирот започнува кога клубените ќе достигнат 20–35мм и цврстина на лушпата доволна да издржи при манипулација и транспорт.
Садењето на отворено се врши на пролет, кога почвата на длабочина од 10см ќе се загрее на 7–8°C, со растојание од 70см меѓу редови и 40см во редот, на длабочина од 8-10см. Времето на садење зависи од климатските услови односно подрачјето. Пред садење потребна е добра подготовка на почвата, длабоко обработена, растресита и добро израмнета. Една од поважните агротехнички мерки е вовоедување на плодоред, со цел спречување на осиромашување на почвата со макро и микро елементи, појава на болести и штетници и појава на ерозија на површинскиот дел на почвата. По никнувањето се врши нагрнување, кое овозможува подобро формирање и развој на клубените. Во текот на вегетацијата, потребно е редовно окопување, уништување на плевелите и следење на појава на болести и штетници. Наводнувањето е особено важно во фазата на формирање и налевање на клубените, бидејќи недостатокот на вода може значително да го намали приносот. Компирот се прибира кога клубените добро ке созреат односно кога надземните делови на растението се исушени тогаш растението е во полна физиолошка зрелост и цврста покожица.
