Во Делчево денеска завршува акцијата за депопулација на домашните свињи во радиус од три километри од првичното жариште каде што беше пронајден вурусот на африканска свинска чума.
Како што информираа ветеринарите задолжени за спроведување на депопулацијата, опфатени се индивидуални одгледувалишта во селата Очипала, Киселица, Селник и други, по што акцијата ќе заврши во одгледувалиштето во село Драмче каде што беа утврдени примероци од вирусот.
Агенцијата за храна и ветеринарство наложи преземање контролни и заштитни мерки со цел ставање на болеста под контрола и нејзино сузбивање.
За утврдување на причинителот на болеста, во тек се епидемиолошки истраги на терен. За сите убиени свињи во заштитната зона во радиус од три километри, согласно изречените мерки со Решението за контролни и заштитни мерки во однос на болеста африканска чума кај свињите од 7 јануари, одгледувачите ќе добијат соодветна отштета.
