Под покровителство на владите на Србија, Северна Македонија и Албанија, а во рамки на иницијативата Отворен Балкан, од 16 до 19 ноември 2023 година во Белград ќе се одржи меѓународниот саем на вино „Винска визија на Отворен Балкан“.
Минатата година саемот привлече над 30.000 посетители, љубители на вино и презентираше повеќе од 350 винарии од регионот, промовирајќи ја богатата винска култура и воспоставувајќи вредни деловни контакти.
„За Саемот 2023 подготвивме програма која има за цел подобро да ги позиционира вината од регионот на светскиот пазар. Приоритет на „Винската визија на Отворен Балкан“ е да пласира што повеќе регионални винарии и затоа овогодинешниот саем ќе биде домаќин на уште поголем број професионални посетители, дистрибутери, новинари и експерти од целиот свет – велат организаторите.
Саемот ќе има изложбено-продажен карактер, а ќе биде поделен на тематски зони на кои ќе бидат претставени автентични вина и автохтони сорти од Западен Балкан и врвни вина од реномирани винарски региони ширум светот. На тематските зони за производители на винска опрема, храна и гастрономија, посетителите ќе можат да уживаат во традиционалните специјалитети и гастрономски деликатеси.
Првиот ден од Саемот ќе биде резервиран исклучиво за професионални посетители, со удобни и пространи простории за состаноци, презентации и B2B работилници. Изложувачите ќе имаат посебни услови, вклучително и субвенционирани цени на изложбениот простор. Форматот на саемот ќе им овозможи на потенцијалните потрошувачи да ги купат прикажаните производи, давајќи можност да развијат деловни контакти и да воспостават нови деловни врски.
Штандовите на саемот ќе бидат приспособени на потребите на винариите, со маси за дегустација на вино, витрини за чаши, украсни аранжмани на шишиња за вино, како и простор за дегустација на вино. Опциите за штандови вклучуваат мали (16 м²), средни (32 м²) и големи (64 м²).
Крајниот рок за пријавување на изложувачите е 19 јуни, а рокот за потврда на пријавата е 10 јули 2023 година.
За повеќе детали за начинот на пријавување погледнете ТУКА.
