Одделението за внатрешни работи во Ресен најави превентивни мерки за поголема безбедност во сообраќајот на подрачјето на Преспанскиот регион.
Од ОВР-Ресен посочуваат дека во пресрет на зголемените земјоделски активности кои ќе се преземаат за време на претстојниот Јаболкобер, потребно е земјоделските машини, тракторите и приклучната механизација, да бидат во исправна состојба и да се регистрирани, технички исправни и прописно осветлени и означени.
– Статистички како најчести причини за случените сообраќајни незгоди во овој временски период биле неосветлени трактори, приколки и работни машини. Затоа апелираме земјоделците внимателно да се вклучуваат и учествуваат во сообраќајот – нагласуваат од ОВР Ресен.
Полициски службеници од Ресен посочуваат брзината на движење да се прилагоди спрема условите на патот и потсетуваат дека брзината на движење на јавните патишта за трактори се ограничува на 30 км/час а за за трактори што влечат приклучно возило со кое се превезуваат лица се ограничува на 25 км/час.
