Во периодот од 15 до 16 октомври 2025 година, во Брисел, Кралството Белгија, се одржа TAIEX работилница на тема „Имплементација на ИПАРД програмите“, организирана во соработка со Директоратот за земјоделство и рурален развој при Европската комисија (DG AGRI).
На работилницата учествуваа претставници од Македонија, Албанија, Босна и Херцеговина, Косово, Молдавија, Црна Гора, Србија, Турција и Украина, со цел размена на искуства и добри практики меѓу земјите-кориснички на ИПАРД програмите и земјите-членки на Европската унија.
Фокусот на работилницата беше насочен кон подобрување на процесите за планирање, управување и мониторинг на ИПАРД програмите, како и споделување на успешни модели за спроведување на јавни повици, критериуми за избор на проекти, финансиска контрола, видливост на ЕУ поддршката и верификација на проекти на терен.
Претставниците на Агенцијата за финансиска поддршка во земјоделството и руралниот развој активно учествуваа во дискусиите и групните сесии, при што беа презентирани и националните искуства во имплементацијата на ИПАРД II Програмата и тековните подготовки за ИПАРД III.
Во рамки на работилницата, директорот на Агенцијата, Илија Стоилев, оствари билатерални средби со директорите на ИПАРД агенциите на Турција, Србија и Црна Гора, на кои беше разговарано за унапредување на меѓусебната соработка, размена на искуства и можности за заеднички активности во насока на поефикасна имплементација на ИПАРД програмите.
Работилницата претставува значаен придонес кон унапредување на институционалните капацитети и понатамошно подобрување на ефективноста во спроведувањето на европските фондови за рурален развој.
АФПЗРР
