Претседателот на Стопанската комора на Северна Македонија, Бранко Азески, ќе реализира работна средба во општина Битола со градоначалникот д-р Тони Коњановски, на која ќе се разговара за активности кои треба да се преземат на локално ниво, за развој на стопанството во битолскиот регион. Патната и гасна инфраструктура, како клучни приоритети во интерес на бизнисите се тема на состанокот, на кој ќе присуствуваат и членовите на Управниот одбор на Регионалната комора во Битола, при Стопанската Комора.
Во делот на гасификацијата, досега е завршен главниот магистрален гасовод Неготино-Битола во должина од 92 километри, и потребно е да се отпочне со изградбата на примарната (дистрибутивна) гасификациона мрежа во градот, за кои што општината веќе има изработено основни проекти.
РЕК Битола како клучен инфраструктурен индустриски капацитет во целиот регион, придонесува со околу 65% од вкупното производство на електрична енергија во државата, а заклучно со декември 2025 година, на територијата на општина Битола инсталирани се околу 120 приватни фотонапонски централи, дел на кровни конструкции на компаниите (под еден мегават), дел на почва (исто така до еден мегават електрична енергија). Се проценува дека приватните инвеститори имаат вкупна инсталирана моќност во битолскиот регион од 35-45 мегавати.
Потребите од кадар за бизнисот остануваат во фокусот на врните прашања за кои секојдневно се разговара и се иницираат активности од страна на бизнис заедницата. За таа цел бројќите покажуваат дека, во средните училишта во Битола и околина има околу 4.000 запишани ученици од кои половина во средните стручни училишта. Битолскиот регион има околу 5000 правни субјекти и придонесува со 9 до 10% во Бруто домашниот производ на нашата држава. Како дел од коридорот 10, патната и железничката инфраструктура во регионот е од суштинско значење, односно реализација на автопат Прилеп – Битола 40 километри и обиколница Битола – Меџитлија 19 километри.
Стопанска комора
