Земјоделството како гранка, полека, но сигурно, повторно станува примамливо, но и исплатливо за македонските земјоделци. Според непосредните производители кои веќе потпишале договори за користење на дополнителни парцели државно земјоделско земјиште, со ова, во наредниот период значително ќе си го зголемат и прошират сопственото производство, а што им е од егзистенцијална важност, бидејќи тие живеат само од тоа.
„Денеска, еве добивме договори за земја, за 30 години. Работиме негде околу 150 хектари. Денеска потпишавме уште за 8 хектари на три различни фирми, за тутун, пченица, сончоглед, значи за повеќе различни култури. Сега најисплатлив е тутунот. Сега за сега, повеќе вложуваме во тутунопроизводството. И во пченицата, имаме 70 хектари и со пченица, имаме околу 600 декари сончоглед, па 70 декари тутун годинава, лани имавме 50, годинава 70“, – вели младиот земјоделец Ердован Исламоски од с. Канатларци.
Од друга страна, со бројните стимулативни мерки кои што ги презема ресорното Министерство, а особено со одземањето на со години узурпираното државно земјоделско земјиште од рацете на невистинските земјоделци и давање под закуп на вистинските, државава има реални шанси да ја намали дури и увозната зависност за храна.
„Знаете дека во изминативе месеци спроведовме контроли кај големи корисници кај што најдовме и злоупотреби. Раскинати се договорите, земјиштето е ослободено. Се работеше изминативе месеци и на ослободување од корисничкото право и веќе во наредниов период можеме да го ставиме и тоа во функција каде што сите земјоделци ќе имаат можност да аплицираат. Предност ќе дадеме во одреден дел и на сточарското производство, однOсно сточарите да имаат предност при добивање на ова земјоделско земјиште“, – изјави Цветан Трипуновски, министер за земјоделство.
Според Трипуновски, интересот кај земјоделците за користење на државно земјоделско земјиште, во зависност од регионот, бил различен за тоа кои култури ќе ги одгледуваат. Но, главно биле застапени сите, што според него е поволен показател за балансирање на домашното земјоделско производство.
Инаку, досега, на ниво на држава, вкупно се распределни над 6.000 хектари необратено државно земјоделско земјиште. А додека по последниот Јавен повик од јануари годинава, потпишани се 192 договори за површинна од близу 500 хектари само во Пелагонскиот регион.
Извор – Алфа
