Кина го забрани директниот и индиректниот увоз на домашни и диви свињи од Хрватска и Босна и Херцеговина поради избувнувањето на Африканската свинска чума (АСЧ). Сите животни кои ќе влезат на територијата на Кина од тие земји ќе бидат вратени во земјата на потекло или убиени, соопшти нивната царинска управа, пренесе Agroklub.
Ова е резултат на појавата на АСЧ во регионот во последните 20 дена.
Болеста прво беше потврдено во Бијелина, БиХ, на 22 јуни, а до 6 јули таму беа еутанизирани 1.689 свињи, а болеста е потврдена во 49 домаќинства.
Се шири и во Србија, поради што, на пример, највисоко ниво на подготвеност е прогласено во Северен Банат, а според последните информации е забележано и на истокот од земјата, во Бор.
Во Хрватска поради АСЧ беа поставени контролни пунктови со полициски надзор, а кон крајот на минатата недела, по Вуковарско-Сремско, болеста беше потврдена и во Бродско-Посавинската жупанија.
Покрај штетите што ги трпат фармите чии свињи се заразени, трпат и други одгледувачи на свињи кои се загрижени како ќе се развива ситуацијата.
„Оние што сега имаат 20 кг, за еден месец ќе бидат 30+, и што ќе правиме со нив?“, прашуваат одгледувачите на свињи.
Во нашата земја заштитна зона има околу потврдените жаришта која ги вклучува населените места с. Петралица, општина Ранковце, с. Нов Истевник и с. Стар Истевник, општина Делчево, с. Трново, с. Мала Црцорија и с. Киселица, општина Крива Паланка.
Болеста лесно може да се прошири преку директен контакт со заразени домашни или диви свињи; со индиректен контакт при голтање контаминирана храна како што се остатоци од храна, пијалаци или отпадоци; со каснување од заразени крлежи и контакт со контаминирана опрема, како што се облека, земјоделска опрема и возила.
