Поради вирус на Африканска чума ќе бидат еутанизирани 11.000 свињи од српска фарма, лоцирана во близина на Рума.
Српскиот министер за земјоделство Драган Гламочиќ наведе дека свињите ќе бидат еутанизирани денеска и утре.
– Вирусот мора што побрзо да се отстрани. Државата ќе го обесштети сопственикот на фармата, но сега тој нема да може повторно да чува нови свињи шест месеци до една година, посочи Гламочиќ.
Тој додаде дека штетата од еутанизијата на свињите изнесува над 1,5 милиони евра.
Африканска чума е вирусно заболување кај домашните и дивите свињи. Вирусот се излачува преку крв, ткива, секрети и екскрети од болни или пцовисани животни. Болеста се пренесува и шири со: директен контакт помеѓу здраво и болно животно, трупови од пцовисани животни и луѓе; индиректно се пренесува преку заразена храна и отпадоци од храна, опрема, возила и облека; како и преку крлежите од родот „Орнитодос спп“.
Смртноста кај домашните свињи од Африканската чума може да биде и до 100 проценти.
Луѓето не се приемчиви на вирусот и болеста.
МИА
