Почитувани производители на грозје, почитувани сограѓани!
По нашата вчерашна објава со која ве запознавме со заклучоците од состанокот на УО на ЗЛ „НАПРЕДНИ ЛОЗАРИ“ за штетите настанати со сушата и вашите реакции на истата, дојдовме до заклучок дека ова здружение такво какво што е конципирано и форматирано го нема потребниот кредибилитет и легитимитет да ве застапува па од тие причини ги „замрзнува“ сите свои активности.
Само ќе ве потсетиме: Благодарение на ЗЛ „НАПРЕДНИ ЛОЗАРИ“ се обесштетени сите лозари кои имаа побарувања во „Петра“ и „Повардарие“.
Благодарение на ЗЛ „НАПРЕДНИ ЛОЗАРИ“ ланската година е сепак откупено цело грозје на име на грозје за вино и грозје за вински дестилат.
Благодарение на ЗЛ „НАПРЕДНИ ЛОЗАРИ“ сите лозари кои предадоа грозје за вински дестилат, покрај редовните субвенции од Владата беа обештетени и со дополнителни средства кои изнесуваа вкупно 8 денари на килограм грозје плус 3 – 4 денари од откупувачот.
Можеби овие работи и не се толку многу за фалење, ама не се ништо.
Во ни еден момент ЗЛ „НАПРЕДНИ ЛОЗАРИ“ не делуваше во ничиј друг, ни политички, ни партиски а ни личен интерес освен во интерес на лозарите. Сите оние кои тврдат спротивно се злобни манипулатори и нечии партиски слуги.
Затоа што ЗЛ „НАПРЕДНИ ЛОЗАРИ“ ги замрзнува своите активности, смета дека нема потреба од обзнанување на предвидените мерки за борба за попристојни цени на откупот на грозјето, а како последна препорака Ви порачува: Почитувани граѓани не си го потценувајте својот производ и не го давајте за мизерни откупни цени. Особено и поради сушата, оваа година не смее да биде откупен ни еден грозд смедеревка под 20 денари, вранец под 25 денари, а асталско и високосортно грозје не смее да се откупува по цена под 30 денари. Необезбедувањето на овие откупни цени ќе претставува крај на лозарската приказна во Тиквешијата онаква каква што ја познаваме. Лозови насади пак ќе има, ама ние ќе мора да одиме како аргати на тие лозови насади…
Фејсбук статус на Здружението „Напредни лозари“.
