Животниот циклус односно фенолошки циклус на лозата се состои од низа од фази, започнува во време на фазата на мирување и завршува во следната вегетациска зимска фаза на мирување. Овој циклус е значаен годишен процес за производство на висококвалитетно грозје и секоја фаза е од големо значење, периодот на зимското мирување е основа за правилен развој на виновата лоза на пролет. По завршувањето на вегетацијата и опаѓањето на листовите, со појавата на пониски температури, виновата лоза преминува во фаза на зимско мирување. Во текот на овој период физиолошките процеси се значително намалени, а растението ја зголемува својата отпорност кон ниски температури. Во наши услови овој период на зимско мирување кај винова лоза трае од ноември до март, зависно од климатските услови и сортата на лозата. Во региони со постудена зима, мирувањето може да биде подолготрајно, а во потопли региони – пократко.
Во текот на зимското мирување се одвиваат важни биохемиски процеси, при што скробот акумулиран во текот на вегетацијата постепено се трансформира во растворливи шеќери. Овие шеќери имаат значајна улога во фазата на мирување и претставуваат енергетска резерва за почетокот на вегетацијата напролет, а истовремено ја зголемуваат отпорноста на лозата кон зимските ниски температури, дејствувајќи како природна заштита од мраз.
Зимското мирување во голема мера зависи од агрометеоролошките услови особено од траењето и интензитетот на ниските температури. Температурите помеѓу 0°C и 10°C овозможуваат оптимално зимско мирување. Доволен број ладни часови овозможуваат рамномерен развој на пупките и квалитетен род. Појавата на екстремно ниски температури може да предизвика оштетувања на лозата, при што пупките се најосетливи при температури под –15 до –18 °C, во зависност од сортата.
Кога лозите ќе влезат во фаза на мирување, се препорачува да се покријат ластарите најмалку 5-6 окца на ластарот со умерено влажна почва. Овој метод осигурува дека пупките од винова лоза се заштитени од зимски мразови, бидејќи почвата обезбедува дополнителен термички слој што го спречува замрзнувањето. Исто така потребно е редовно следење на агрометеоролошките прогнози и предупредувања во текот на зимскиот период поради навремена проценка на ризиците и планирање на агротехничките мерки во лозарството.
Извор – УХМР
