Временските услови, омикрон и други фактори ја диктираат понудата и побарувачката на светскиот пазар.
Во последните месеци на пазарот на житарки беше многу турбулентно, а сега на крајот од годинава, цената на пченицата повторно порасна.
Има многу фактори кои влијаат на поскапувањето, а примарен страв е од нискиот принос во Јужна Америка поради метеоролошката појава Ел Нино, руските и аргентинските, но и можните украински извозни ограничувања. Тука е и неизвесноста на жетвата во Бразил и Австралија и општо проблемот со снабдувањето поради пандемијата на вирусот ковид-19 и сите негови соеви.
Еден тон пченица повторно блиску до 300 евра
Цената на пченицата на европскиот пазар пред празниците се зголеми, па така еден тон чинеше 290,25 евра, велат од Аgrarheute. Ова е зголемување од 17 евра по тон за само десет дена, а слични трендови се забележани и во Русија и во САД. На Париската берза пќеницата денес котира по 296 евра/тон.
Покрај зголемувањето на цената на пченицата и ограничувањето на извозната квота, Русија има и повисока извозна такса која сега изнесува 94,90 долари за тон. Таму зимските култури засега се во добра состојба и производителите се надеваат на високи приноси. Од Украина пак пристигнуваат вести дека ќе има ограничувања за извозот на лебната пченица.
Сегашната реколта на оваа житарка во Аргентина се проценува на рекордна вредност од 21,5 милиони тони. Новина на светскиот пазар е што Алжир се наметна како купувач на 690.000 тони пченица од Германија, Црно Море, Балтик и Аргентина.
Дожд на југ и суша во Северна Америка
Растат и цените на маслодајните растенија и пченката. Временската прогноза, која предвидува дожд во Јужен Бразил, Парагвај и Аргентина во наредните недели, предизвика загриженост околу жетвата на пченка и соја. Вознемиреност, но поради сушата, владее и во регионите на САД познати по земјоделството.
Кина најави дека во наредната година ќе ги задржи површините под жито и следната година и ќе го прошири производството на соја и други маслодајни семиња. За нив примарна цел е да го обезбедат населението со ефикасно снабдување со месо, риба и зеленчук во 2022 година.
Покрај побарувачката за пченица, расте и увозот на јачмен од Европа, посебно од Франција. Тоа доведува до повисоки цени, бидејќи поради ограничениот увоз на пченка од Украина, европските производители ја бараат оваа житарка. Цената на сточната во Хамбург на 23 декември беше 263 евра за тон. На францускиот пазар на големо тогаш се продавала по 265 евра/тон, што е зголемување за 20 евра.
Сè додека трае пандемијата на ковид-19, ќе има пореметувања на светскиот пазар на храна и ќе владее голема загриженост за обезбедување на снабдувањето без застој. Новиот вид омикрон брзо се шири и предизвикува логистички проблеми кога станува збор за безбедноста на храната, пренесува Agroklub.com.
