Пад на цените на нафтата на светските берзи

Цените на нафтата на меѓународните берзи вчера забележаа пад откако Меѓународниот монетарен фонд (ММФ) ја намали прогнозата за растот на светската економија и предупредувањето дека инфлацијата претставува „непосредна закана“ по многу земји. На Лондонската берза барел нафта вчера се тргуваше за 109,22 долари, што е намалување за 3,94 долари во споредба со претходниот ден. На американските берзи барел нафта чинеше 104,41 долари, што е намалување за 3,8 долари.

Русија поради санкциите воведени во март произведе помалку нафта, додека Организацијата на земјите извознички на нафта (ОПЕК) и нејзините сојузници повторно не ги исполнија договорените производствени квоти. На почетокот на неделата снабдувањето со нафта беше нарушено и поради блокадата во Либија.