Земјоделската работа на полињата може да биде напорна и одзема многу време, што е особено изразено во сезоната на жетва. Тогаш возачите на комбајни, берачи и друга земјоделска механизација се изложени на целодневна, па и ноќна работа. Особено е стресен период кога временските прогнози најавуваат дожд и кога се прават обиди да се заврши со работата пред врнежите.
Уморните и изнемоштени возачи можат да заспијат додека управуваат со механизацијата, а само секунда е доволна за да предизвикаат сообраќајна несреќа и материјална штета.
Системи за предупредување на поспаност или помош за зголемување на вниманието веќе постојат во камионите и автомобилите. Руската компанија „Ростселмаш“ ги приспособила на земјоделската механизација и на возачите кои извршуваат сложени работи на управување со различни операции.
Компанијата развила и надградила посебен модел RSM Ok ID, еден вид асистент кој може да ја следи состојбата на возачите на земјоделските машини и да ја запре нивната работа или работата на другите компоненти.
Агритехника иновацијата RSM Ok ID ја наградила со сребрен медал. Системот континуирано ја следи состојбата на возачот на земјоделската машина. Доколку открие знаци на поспаност или други промени, го алармира со звучен сигнал и ги испраќа податоците до Agrotonicа, која автоматски врши запирање преку системот ISOBUS.
Камерата сместена во кабината ги надгледува зениците, трепкањето, положбата на главата, а се детектираат и отчукувањата на срцето. Системот препознава типични знаци на поспаност како што се често трепкање, затворање на очите подолго од три секунди, зевање, триење на очите, спуштање на главата.
