Нема одмор, градинарите имаат полни раце работа. И оваа година производителите на зелка ги насадија површините во Струмичкиот регион, со надеж за добар род и заработка, особено на домашниот пазар. Зелката добро роди, а и квалитетот е одличен.
Струмица отсекогаш е позната по одгледување на раноградинарски култури, пред се зелка, пиперки, краставици и домати, па многу земјоделци се одлучуваат токму за производство на овој вид на зеленчук.
Живко Милчев сопственик на откупниот пункт Вен вочар од село Муртино – Струмичко, вели дека откупот на зелка е во полн ек, поголемиот дел од зелката се извезува на пазарите во Украина, а дел завршува и на домашниот пазар. Освен што откупуваат од градинарите тие имаат и сопствено производство на зелка и краставици.
-Имаме 15 декари засадено со зелка и 5 декари со краставици, задоволни сме од родот и секако квалитетот. Имаме голема побарувачка, дневно откупуваме по 40 илјади парчиња пиперки, краставиците ги пласираме на нашите пазари, а 4 тони испративме за Украина. Лани откупивме 1.700 тони зелка и 1.600 тони краставици, рече Живко.
На почетокот на бербата пролетната зелка во струмичко се откупуваше по цена и до 65 денари за килограм па задоволно триеја раце и трговците и производителите. Информациите од терен тогаш покажаа дека ваквата висока цена на зелката се должи на зголемената побарувачка, но и недостигот на пролетна зелка во земјите од соседството. Пролетната зелка чија откупна цена денес се движеше од 35 до 40 денари за килограм во најголем дел се извезува во Украина, Полска како и Бугарија и Романија.
Инаку зелката неколку години е најизвезуваниот зеленчук од Македонија. Почетната откупна цена на зелката секогаш е висока за првите берби и до крај на бербата цената паѓа но земјоделците главно се задоволни од просечната цена која ќе ја имаат со завршување на сезоната. Поголемите производители на зелка и тие што порано ја засадиле веќе се при крај на бербата, а најголем бум се очекува кон крајот на овој и почетокот на наредниот месец.
Земјоделците со кои разговаравме велат дека зелката има одличен квалитет, ги применуваат сите агротехнички мерки, така да како што велат работата и маката на оние кои засеале зелка оваа година ќе биде награден. Инаку, покрај пролетната зелка на откупните пунктови во Струмичко се наоѓаат и младите лути пиперки кои се откупуваат по 80 денари за килограм како и краставици од домашните произодители чија цена се движи од 75 до 80 денари за килограм.
Во Струмичкиот регион се засадени околу илјада хектари под пролетна зелка и се очекува принос од над 50 илјади тони.
