Нестабилното време со локални врнежи што ја зафати земјава овие денови, според агрометеоролозите, има позитивен ефект врз земјоделството. Новите дождови ќе ја подобрат состојбата со влагата во почвата, што е особено значајно по долгите топли и суви периоди.
Земјоделците се советуваат да не ги прекинуваат активностите околу посевите. Во тек е предсеидбената подготовка на почвата – процес што, како што нагласуваат експертите од УХМР, е клучен за високи приноси. Подготовката мора да биде навремена и квалитетна за да обезбеди акумулација на вода и хранливи материи и непречен развој на кореновиот систем. Паралелно со обработката се препорачува и основно ѓубрење.
Во моментов, во повеќе региони се одвива бербата на овошки, а и винова лоза од сортите вранец, смедеревка и кардинал е во завршна фаза на зреење. Иако лозата е отпорна на суша, стручњаците предупредуваат дека високите температури и недостатокот на дождови може да се одразат на квалитетот на грозјето.
Метеоролозите најавуваат дека нестабилното време ќе продолжи. Денеска ќе има променлива облачност и локални дождови, утре е можен изолиран дожд, а во недела повторно ќе има поројни врнежи со грмежи и поинтензивни процеси на одделни места.
Во услови на електрични празнења, се апелира до граѓаните на зголемена внимателност и избегнување престој на отворен простор.
УХМР
