Министерот за земјоделство, шумарство и водостопанство, Љупчо Николовски, денеска беше во посета на компанијата за преработка на свежа и разладена риба и складирање на овошје „Метро“.
„Денеска посетив уште една успешна ИПАРД инвестиција, компанијата за преработка на свежа и разладена риба и складирање на овошје “Метро”.
Со финансиска поддршка од ИПАРД програмата, компанијата го модернизирала производството преку набавка на специјализиран ладилник и современа опрема. Оваа компанија е позитивен пример дека мерките што ги преземавме за скратување на административните процедури, функционираат и во пракса.
Токму оваа компанија во 2018 година аплицира за мерката од ИПАРД програмата, и за само 3 месеци склучува договор со Платежната агенција, по што за 4 месеци е реализирана и исплатена инвестицијата и поддршката во износ од близу пола милион евра.
Земјоделците и агробизнисмените ги препознаваат бенефитите од ИПАРД програмата.
Со вакви мерки Северна Македонија продолжува да биде лидер во искористеноста и придобивките од ИПАРД фондовите.“, вели министерот Николовски.
