Месната Заедница на село Лазарополе и Здружението на поранешни жители на село Лазарополе доставија Приговор Итно барање за стопирање на објавен оглас до Министерство за земјоделство, шумарство и водостопанство, Министерство за животна средина и останатите одговорни државни и странски институции, со цел за Стопирање на огласот објавен од страна на Министерството за земјоделство, шумарство и водостопанство со број 03 од 4.06.2022 година за давање под закуп на земјоделско земјиште во државна сопственост за површини над 3 хектари.
По нивниот приговор се огласи министерот за земјоделство, Љупчо Николовски.
„Сакам да ја информирам јавноста дека по добиена реакција од страна на Здружението на поранешни жители на село Лазарополе, комисијата за давање во закуп на земјоделско земјиште во државна сопственост ќе изврши поништување на дел од огласот 03/22, односно за КО Лазарополе место викано Ливатчиња ИЛ 100, КП 118/1.
Наша примарна цел при распишувањето на овие јавни огласи беше секоја педа слободна обработлива површина да ја ставиме во функција за производство на храна.
Од друга страна наша основна задача како министерство е заштита на растенијата и шумите, особено на посебните видови и токму затоа благодарен сум за ова укаживање и истото го прифаќаме и веднаш постапуваме.
