Плодот на црешата од сортата „Слатка Стефани“ (Sweet Stephany), се смета за најтежок во светот – 26,45 грама. Набрана е во експерименталниот овоштарник на фирмата „Салви Виваи“ од италијанскиот регион Емилија-Ромања, каде што оваа сорта ја развиле агрономи од Универзитетот „Алма Матер“ во Болоња.
Неодамна беше официјално запишана во Гинисовата книга на рекорди, а нејзиниот плод е потежок од костенот и има скоро иста грамажа како кајсијата. Но, тоа е далеку од просечната тежина на овој вид овошје за кое вагите обично покажуваат помеѓу седум и осум грама, пишува Дире.ит.
„Откако дозреа во јуни минатата година, се истакна со својата посебна големина“, тврдат производителите. Тие додаваат дека за многу краток временски период, бидејќи станува збор за расиплив производ, бил свикан тим на експерти, кој потоа ја започнал постапката за нејзино вклучување на престижната светска ранг-листа.
Но, ова не е прв италијански рекорд кога станува збор за големината на овој вид овошје. Како што пишува Виваиталиа, уште во 2003 година, овоштарот Герардо Магипинто од Самичеле ди Бари поставил рекорд со сортата Ла Гранде Цилиегија (La Grande Ciliegia).
Плодот кој тогаш победил тежел 21,69 грама, а на водечка позиција се задржал 16 години сè додека пред две години не го надмина цреша од Чиле, која била набрана во Патагонија и тежела 23,93 грама.
