Шпанија може да се пофали со уште еден гастрономски успех, со најскапиот леб во светот кој се продава за 1.480 евра.
Златото и среброто се луксузните состојки на најскапиот леб на светот, кој се продава по цена од 1.480 евра и ги фасцинира богатите клиенти од Блискиот Исток, Русија и Кина.
Овој луксузен леб се продава во пекарницата „Пан Пина“, која се наоѓа во шпанското село Алгатоцин во близина на Малага.
Креаторот на овој егзотичен леб е Хуан Мануел Морено (46), кој работи во пекара 14 години заедно со тим од 10 жени. Пекарата ја основале бабата и дедото на неговата сопруга во 1940-тите, а пред неколку години нејзиното семејство сакало да ја затвори, па тој се понудил да ја преземе.
До идејата да го создаде овој луксузен леб Морено дошол кога станал свесен дека во продавница во Марбела се доставува најскапото кафе на светот.
Морено тврди дека го создал најскапиот леб на светот, употребувајќи злато и сребро во неговиот состав. Главна карактеристика е тоа што во лебот има сребро и злато во три различни форми: во прав, како снегулки, и друга форма што му дава на овој леб 3Д изглед. На лебот има и еден вид тетоважа направена со слад.
Според Морено, секоја векна, која тежи 400 грама, има состојки во вредност од 900 до 1.100 евра. Сите лебови се направени со висококвалитетно брашно, а цената може да варира малку во зависност од цената на златото на пазарот, иако вели дека цената за неговите клиенти „секогаш ќе биде иста“.
Процесот на правење на лебот трае околу 18 часа. Такво е и мотото на пекарницата: „леб без брзање“.
Неговиот експеримент со ставање злато во лебот почнал уште во 2016 година кога го создал својот прв леб направен со злато што се јаде и спелт (познат како лупена пченица). Лупената пченица била широко користена во Европа за време на бронзеното доба и во средновековната ера.
Лебот се продавал по цена од 117 евра, а таа година биле продадени 150 векни.
Морено објаснува: „Користевме злато што се јаде, кое е здраво и корисно кога се користи во правилни пропорции. Всушност, се вели дека златото се консумирало уште во старите кинески династии, а денес се користи во кинеската медицина, како и среброто, кое е исто така здраво“.
Една година подоцна, пекарата лансираше друг вид леб, исто така користејќи злато како состојка, но овој пат беше ставено на површината, „давајќи му на лебот 3Д изглед“.
Така, по неколку години експериментирање со ставање злато во лебот, тој пред неколку месеци го лансираше и најскапиот леб кој чини 1.480 евра. Вели дека станал хит кај богатите луѓе кои живеат или ја посетуваат Коста дел Сол.
