Има заинтересирани инвеститори за купување парцели во индустриската зона Речица, информираше денеска градоначалникот на Куманово, Максим Димитриевски.
На последната презентација можностите за вложување во зоната ја разгледале и домашни и странски бизнисмени.
-Потенцијалите на индустриската зона Речица се големи, смета Димитриевски.
Тој најави организирање на дополнителни презентации за претстојното јавно наддавање кое се очекува да се случи кон крајот на мај годинава.
– Корона-кризата, лани нè спречи да организираме презентација и јавно наддавање, сега научивме да живееме со ковид-кризата. Зоната има голем капацитет, се простира на површина од 67 хектари има повеќе од 50 парцели на кои може да се врши градба на капацитети од лесна, незагадувачка индустрија, има локации за трговски единици, шопинг центри и хотелски капацитети. Имаше интерес и прашања од потенцијалните инвеститори – изјави Димитриевски.
Кон крајот на мај, годинава ќе бидат понудени 12 градежни парцели, четири со намена Г2-лесна незагадувачка индустрија, две со намена за хотелски комплекси и шест за големи трговски единици. Цената и големината на парцелите се различни, за Г2 цената е 61, за хотелски комплекси 283 и за големите трговски единици 800 денари по метар квадратен. Надоместот за комуналии е 40 денари за метар квадратен, доколку добијат право на градење.
– Урбанистичкиот план за индустриската зона во Речица е донесен пред десетина години, но своевремено од тогашната Влада беше одземена од општината, беа продадени неколку парцели и повторно е вратена на општината. Успеавме сега заедно со Владата да реализираме инфраструктурен проект во делот на изградба на инфраструктурата, пристапни патишта асфалтирање, изградба на атмосферска канализација – додаде Димитриевски.
Зоната се наоѓа на атрактивна локација во непосредна близина на автопатот кон Табановце, (во близина на село Речица) на само пет километри од српската граница и е во близина на двата коридори 8 и 10. Таа е урбанистички уредена за лесна и незагадувачка индустрија, трговски единици, сместувачки капацитети, сервиси и стоваришта. Владата претходно одвои средства за инфраструктурата во вредност од 24 милиони денари.
