Потребни се пет килограми домати кои треба да се измијат и да се избришат. Отстранете ги стебленцата. Исечете го доматот на половина, извадете го семето, а потоа половината од доматот исечете ја на парчиња дебели од 1 до 1,5 сантиметар.
Сушените домати можете да ги користите во подготовка на повеќе јадења како што се чорби, салати, пици, сосови, но и со печења како и со многу други јадења.
Освен за сопствени потреби, оваа зимница е добар начин како производителите да го зголемат асортиманот на преработени производи кои ги продаваат и добар пример како да им се даде дополнителна вредност на доматите, особено ако се пакуваат во мали, атрактивни теглички. Треба да се напомене дека доматот е еден од ретките производи кој со преработката не ги губи нутритивните вредности.
Се сушат од 6 до 24 часа
Загрејте ја рерната на 65°C. На тава ставете хартија за печење и на неа наредете ги доматите, но внимавајте парчињата да не се допираат.
По желба доматите посолете ги или додадете некој зачин. Најдобро одговараат со босилек и оригано, но може и лук.
Ставете ја тавата со доматите во рерна и печете ги, или подобро кажано сушете ги од 6 до 24 часа. Должината на сушењето зависи од сортата, големината и количеството на влага. Така, да речеме, индустриските домати ќе се исушат побрзо бидејќи имаат помал удел на вода, додека на доматите „воловско срце“ ќе им треба повеќе време за да се исушат.
Контролирајте ја температурата и по потреба малку зголемете ја или намалете ја. Одвреме навреме вртете ги доматите за да се сушат од двете страни.
Чувајте ги во фрижидер, замрзнувач или шпајз
Доматите се готови кога ќе добијат темно црвена боја. Треба да се внимава бидејќи не смеат да бидат премногу тврди или крцкави. Ако забележите дека се уште се лепливи и влажни, продолжете со сушење.
Кога се готови, оставете да се изладат, па потоа ставете ги во ќесички, пластични садови или тегли.
Вака подготвените домати во фрижидер можат да се чуваат две-три недели, а во замрзнувач можат да стојат од 8 до 12 месеци.
Ако ги оставите во замрзнувач, немојте да ставате големи количини во ќесичката или во садот бидејќи ќе ви биде тешко да ги разделите.
Сушените домати можете и да ги полиете со масло (најдобро маслиново), со додаток на листови босилек и чешниња лук. Вака подготвените домати можат да се чуваат долго време во тегла, на темно и студено место бидејќи маслото и солта се конзерванси кои ќе ги штитат од расипување.
