Во село Чифлик, Општина Сопиште живее семејството Исмаили кои обработуваат 10 хектари под јагоди, домати, компири, а имаат и насад со цреши.
Малку е да се каже дека се вредни, сликите зборуваат за тоа, но вниманието ни го привлече скромниот матурант, Бесар, кој со мерак работи на нивите, особено кај јагодите, а на училиште реди петки.
-Кога сум втора смена во училиште, прво рано сабајле доаѓам кај јагодите, а после се вклучувам на онлајн настава. Просекот ми е 5.00. Ја сакам и струката која ја учев, сообраќаен техничар, но многу го сакам и земјоделското производство – вели за Агротим Бесар.
Во работата се вклучени целото семејство, и произведуваат различни култури. За јагодите вели дека не се тешки за производство но мора да се биде внимателен и секојдневно да се биде во насадот.
-За да произведеш вакви убави и квалитетни јагоди, мора да се вложи многу работа и тоа секојдневно. Имаме систем капка по капка и тоа е многу важно за ова производство, мора наводнување. Исто така и прихрана и заштита, за да се извади ваков квалитет кој нема проблем за пласман – вели Бесар.
Во производството користат покривка од слама која има двојна улога, штити од мраз во текот на зимата, а потоа овозможува да нема кал и да бидат јагодите чисти.
За цена и пласман вели дека е добро, задоволни се. Скоро секоја година јагодите ги продаваат на трговец од нивното село кој ги пласира на косовскиот пазар.
-Годинава цената е 100 денари за ваков квалитет и добро е, не се жалиме. Ако работиш, се исплати. Секако ќе продолжам и натаму да се занимавам со земјоделство оти го сакам и го работам со мерак а ќе продолжам и на факултет – заклучува Бесар и додава, да не заборавиме да го спомниме неговото братче кое има само 6 години но работи на јагодите како вистински земјоделец.
Секоја чест, наши млади земјоделци!
