Абди Риза од битолското село Велушина, уште од мал покажал љубов кон земјоделската работа. Неговата фамилија егзистенцијата ја обезбедува од земјоделско производство, одгледуваат крави и на 40 ха произведуваат луцерка и пченка. Како помал, секоја можност ја користел да помогне во работите на поле и во фармата. Иако е млад, има само 23 години многумина на негова возраст би се одлучиле за живот во град, сепак Абди за Агротим открива дека сточарството го исполнува и дека е задоволен од животот во село.
– „Татко ми Самедин одгледува стока и јас избрав да останам во село, навиката за работа ја стекнав како дете и сега ништо не ми е тешко. Кога некој работи паметно и ја сака работата резултати мора да има и ние сме задоволни. На околу 40 ха, садиме пченка, луцерка и сточен грашок за добиточна храна. Имаме околу шеесетина крави од расата Фризиска, сега сееме сточен грашок да имаме за нивна исхрана. Набавивме и сопствена механизација, 5 трактори сите на „Солис“ кои ги купивме од „Хемометал“, ги користиме за орање и сите можни операции во земјоделството. Презадоволни сме од соработката со оваа компанија, првиот трактор од нив го купивме во 2013 година и досега од таму набавивме уште 4 “, вели овој млад земјоделец.
Посочува дека доколку се работи домаќински може да се живее од оваа работа.
– „Многу значи да се има желба да го работиш ова. Од мал гледав како моите инвестираат во земјоделието и намерата да се добие квалитетен производ. Целата количина на млекото ја предаваме во приватна млекара, а цената достигнува и до 34 денари за литар. Корисници сме на субвенции и можам да кажам дека се добри ама сепак да бидат навреме исплатени кога ни се и најпотребни, смета тој. Вели дека годинава родот потфрлил, затоа што сушата го направила своето а и имале и проблем со ненавременото доставување на вода од Хидросистемот Стрежево.
Што да се каже после ваква приказна од млад земјоделец освен дека неговата работа е за секоја пофалба и мотивирачка за сите други млади кои можат својата егзистенција да си ја обезбедат во земјоделскиот сектор. Потребна е желба, работа, професионалност и се разбира, модерна механизација за рентабилно производство.
