Италијанскиот остров Сардинија се соочува со инвазија на скакулци. Годинава тие се појавиле еден месец порано и буквално „ги голтаат“ посевите во провинцијата Нуоро каде што се уништени 25.000 хектари посеви.
Бидејќи се работи за полифагни штетници, погодени се сите посеви: градини, зеленчукови градини, овошни насади. Зад скакулците остануваат опустошени површини, а повеќемесечниот труд на земјоделците исчезнува. Со своето напредување скакулците предизвикале вистинска биолошка катастрофа. Поради нив сточарите мораат да купуваат скапа храна за добитокот, бидејќи се што посеале е уништено.
Леонардо Салис, претседател на единицата Колдирети Нуоро, за Гардијан изјави дека посевите се целосно уништени. Тој предупредува дека по три години предупредувања, поплаки и предлози до надлежните за справување со инсектите, ништо не е преземено и се уште се зборува за инвазија.
Земјоделците се разочарани бидејќи не добиле ниту евро за да ја надоместат штетата од минатата година.
Габриела Мургија, советничка за земјоделство, изјавила дека работната група за борба против скакулците заедно со шумските работници ги идентификува најтешко погодените области и ги забрзува операциите за нивно контролирање. Таа апелираше на максимална соработка меѓу земјоделците и другите засегнати страни.
Новата инвазија се случила неколку дена откако регионалните власти одобриле обештетување од два милиони евра на земјоделците чии посеви биле оштетени од инсекти во 2021 година.
Предложени мерки за сузбивање
Климатските услови овозможиле преголемо размножување на овие инсекти. Благите зими и температурите за 0,5ºC повисоки од просекот биле погодни за опстанокот на голем број јајни легла.
Биолошките методи се најефикасни во борбата против овие инсекти. Здружението на земјоделци предложило есенско орање со кое ќе се уништат голем број легла на необработени површини. Дополнителен проблем се големиот број напуштени имоти кои не се обработуваат. Природните непријатели на скакулците можат да го десеткуваат нивниот број. Птиците играат најголема улога.
