Честички микропластика се пронајдени во говедско и свинско месо што се продаваат во супермаркетите, како и во крвта на домашните животни на холандските фарми.
Научниците од Универзитетот Врије во Амстердам, во нивната пилот студија пронашле честички микропластика во три четвртини од тестираните производи од месо и млеко и во секој примерок од крв од животните на фармите.
Микропластика била пронајдена и во секој тестиран примерок од добиточна храна, што укажува на потенцијално важен пат на контаминација. Прехранбените производи се пакуваат во пластика, што е уште еден можен извор.
Истражувачите од Универзитетот Врије првпат пријавиле присуство на микропластика во човечка крв во март и го користеле истиот метод на тестирање за да ги проверат животинските производи. Откривањето на честичките во крвта покажува дека тие патуваат низ телото и можат да се задржат во органите.
Влијанието врз здравјето на луѓето или животните на фармата сè уште не е познато, но истражувачите се загрижени бидејќи микропластиката во услови на лабораториски истражувања предизвикува оштетување на човечките клетки, а веќе е познато дека честичките од загадениот воздух влегуваат во телото и предизвикуваат милиони прерани смртни случаи годишно. Познато е и дека микропластиката загрозува дел од дивиот свет.
Пилот студијата е спроведена за да се процени дали микропластиката е присутна кај домашните животни, месото и млечните производи.
„Тоа би требало да делува како поттик за понатамошно испитување на целосниот степен на изложеност и сите ризици што можат да бидат поврзани со него“, нагласува д-р Хедер Лесли, водач на истражувачкиот тим.
Научниците тестирале 12 примероци крв од крави и исто толку свињи и во сите откриле микропластика, вклучувајќи полиетилен и полистирен. Од 25 примероци млеко, анализирано е млеко од тетрапак во супермаркети, резервоари за млеко на фарми и од рачно молзење. Осумнаесет примероци, вклучувајќи најмалку еден од секој вид, содржеле микропластика.
Седум од осум примероци од говедско месо и пет од осум примероци свинско месо биле контаминирани.
