Благојче Настевски од село Езерани, Преспа, со пчеларство се занимава 18-тина години.
„Пчеларниците се наоѓаат во Езарани, во природниот резерват за птици. Местото е еколошки чисто, недопрена природа. Нема издувни гасови, нема фабрики“, вели Благојче.
Благојче произведува различни производи од мед. Неговите производи се интересни и по изглед и по вкус. Во неговиот разновиден меден асортиман може да се најде мед со чувар куќа и други лековити растенија, природен мед со лешник, бадем, сончоглед, бразилски орев, сува кајсија, орев, брусница, семки од кајсија, семки од тиква , кикирики мед со полен, црно семе и масло од црно семе, мед со сува цреша, полен и сува слива…
„Инспирација наоѓам од стари признаени рецепти што се покажале многу добро со генерации, а и од мое искуство гледам дека е навистина така. А, читам и литература“, ни открива Благојче.
Благојче ни опиша како става сосема празни тегли во сандаците со пчелки, па тие сами си градат пита како што ним им одговара, а потоа тој само дополнува со течен мед.
Задоволен е со пласманот на неговите производи и планира и во иднина да продолжи како и досега.
„Имам добри, стабилни муштерии, а тие се стекнуваат само со чесност, професионалност. Има купувачи, секогаш ќе има луѓе што го ценат квалитетот. Планот е и натаму така…“
