Eкстракт направен од кората на калинката, би можел да биде штит кој ќе го спречи навлегувањето на вирусот Covid 19 во организмот на човекот. Овој екстракт во лабораторија се покажал ефикасен, а тоа дополнително треба да го потврдат и клиничките испитувања.
Калинката, која е едно од четирите библиски растенија и која уште е наречена „еликсир на младоста“ би можела да помогне во превенција од корона вирусот, покажало истражувањето направено во Медицинскиот факултет во Бања Лука од страна на тим составен од деканот на факултетот Ранко Шкрбиќ, неговиот колега Реља Суручиќ од Катедрата за фармакогнозија и Биљана Тубиќ од Катедрата за фармацевтска хемија.
Овој факултет, уште пред две години во соработка со Институтот „Др. Јосиф Паниќ“ од Белград започнал да прави сериозни истражувања со екстрактите од калинка.
– „Станува збор за екстракт кој се добива од кората на калинката која најчесто се фрла. Нашите баби ја сушеле таа кора и од неа правеле чај за децата кога имале дијареа. Потврдено е дека екстрактите добиени од кората на калинката имаат антибактериски дејства и така започна се. Екстрактот почнавме да го применуваме кај пацинетите кои имаат дијабет тип 2 и се покажа дека препаратот ја намалува маснотијата и шеќерот во крвта, го подобрува крвниот притисок и делува антивоспалително. Со таа студија беа опфатени околу 60 пациенти и резултатите беа извонредни“, раскажува Шкрбиќ.
Кога корона вирусот се појави и во Република Српска, Шкрбиќ ги собрал своите соработници, кои целото свое знаење и труд го вложиле во новото истражување користејќи “in siliko” метода или компјутерска хемија.
-„Намерата ни беше да утврдиме дали супстанците од кората на калинката делуваат на спречување на влезот на вирусот во организмот“, изјавила Тубиќ.
Реља Суричиќ појаснува дека информациите добиени од другите истражувачи и сознанијата за корона вирусот биле добра основа за почеток.
– „Ги испитувавме сите сложени хемиски структури од кората на калинката и ги споредивме ефектите кои се добиваат со нивна употреба со ефектите на лековите кои на почетокот од пандемијата беа користени во Кина како терапија“, вели Суричиќ.
Првиот човек на Медицинскиот факултет во Бања Лука, истакна дека ова истражување, кое е објавено и во едно канадско-америкнаско списание, нема тука да застане. Имено, како што вели Шкрбиќ, целта на истражувачкиот тим е после неколкуте лабораториски анализи да дојдат и до клиничко испитување, па екстрактот од кората од калинка да почне и официјално да се применува.
Серолошко истражување
Ранко Шкрбиќ вели дека Медицинскиот факултет има полни раце работа и кога станува збор за серолошкото испитување.
-„ Ни пристигнаа првите 40 примероци и сметам дека веќе на почетокот на следната недела ќе завршиме во Бања Лука. Наредните денови ќе почне собирањето на примероци од околните општини“ – изјави Шкрбиќ и додава дека до крајот на декември треба да ги имаат и првите резултати за колективниот имунитет на граѓаните.
Извор: ekapija.com
