Марјанчо Цветкоски од Прилеп, е регистриран земјоделец кој задно со сопругата Христина 20 години произведуваат тутун на 4 ха во село Марул, со годишно производство од 5 до 8 тони исклучително квалитетен тутун.
Од земјоделско производство освен тутун, обработуваат и житарици на 20 ха, а имаат и фарма со 19 грла добиток за месо и 5 трактори.
Нивната земјоделска приказна трае веќе 20 години и е на високо професионално ниво. Затоа се и успешни, ќе рече некој.
Тема за разговорот ни е актуелниот откуп на тутун и воопшто производството на оваа традиционална култура за прилепскиот регион.
-Ние сме четиричлено семејство и скоро 20 години произведуваме тутун на еден современ и механизиран начин. Механизцијата значително ни ја олеснува работата но останува проблемот со недостиг на сезонски работници. Најмногу работиме со сопругата, децата помагаат колку можат, но сепак се потребни сезонски работници, а тие се потешко се наоѓаат. Тоа се главно повозразни луѓе и ова им е дополнителна дејност. Тутунот е трудоинтензивна култура, со работа почнуваме уште од 25 февруари со подговка на леите, расадот, па пакување на тутунот до Нова година или додека не заврши откупот. Лани на пример заврши во февруари. Значи цела година имаме работа – вели Цветкоски.
За годинешниот род вели дека е со исклучителен квалитет, но поради сушата родот е намален.
-Годинава очекував 10 тона дека ќе произведеме, но поради сушата родот е 8 тона тутун со многу добар квалитет. Ние имаме многу вложувано во ова производство, сушари, фолија, најлон, објекти и механизација. Секоја година произведуваме мегу 5 и 8 тони тутун зависи од временските прилики и тоа високо квалитетен. Годинешната цена од 400 денари е добра, но јас би рекол повторно неправедност има кон нас што произведуваме квалитет.Имаме и големи вложувања, веќе кажав какви инвестиции имаме направено и дополнително плаќаме работна рака. Мислам дека треба да се прави разлика и дека не е важен квантитетот туку квалитетот- вели за Агротим Цветкоски.
И покрај проблемите, вложениот труд и инвестирањето, Цветкоски е задоволен од производството на тутун. Нивната земјоделска приказна го потврдува фактот дека ако се работи професионално, ако се инвестира во производството, ако се следи новото време и се едуцираат, успехот е гарантиран.
Како вистинско земјоделско семејство, тука се и производствата на житарици и кравите производство на месо, систем крава – теле.
Сликите сами за себе зборуваат за какви професионалци се работи.
Секоја чест за нашите вредни земјоделци!
