Малите хидроакумулации во Струмичко се полни и прелеваат, додека големите чекаат врнежи за да се наполнат. Но, и покрај тоа акумулираната вода во браните е доволна за пиење и наводнување, а површините од околу 2 илјади хектари ќе можат да се наводнуваат веќе од март, кога и официјално почнува сезоната за наводнување.
Според денешните мерења, двете најголеми брани „Турија“ и „Водоча“ се полни помалку од половина, а малите прелеваат.
-Во „Турија“ се насобрани скоро 18 милиони кубни метри вода од вкупно 50 милиони, а во „Водоча“ има 11,5 милиони од вкупен капацитет од 27 милиони кубни метри вода. Помалите акумулации „Новоселка“, „Маркова река“, „Чаушица“ и „Иловица“ се полни и прелеваат, информира Лазо Ѓоргиев, директор на АД Водостопанство на Македонија-Подружница „Струмичко Поле“, Струмица.
Од акумулацијата „Турија“ градот Струмица троши меѓу 5 и 6 милиони кубни метри вода за пиење годишно, а за наводнување се користат 18 милиони кубни метри вода, додека од браната “Водоча“ се трошат околу 6 милиони кубни метри вода за наводнување.
Според Ѓоргиев, и годинава се очекува да продолжи трендот на стабилна наплата за користењето на водата за наводнување, кој се движи околу 98 отсто.
Тој апелира и на совесно користење на каналската мрежа која е отворена и според него се очекува во наредниот период да се реализира проектот за затворање на каналската мрежа и со тоа и драстично да се намали загубата на вода за наводнување.
