Козја сурутка – течност која го штити организмот од болести

Козјата сурутка е зелено-жолта течност, што претставува нуспроизвод во производството на сирење. Овој древен лек го препорачувал и самиот Хипократ. Иако може да се прави од сите видови млеко, научно е докажано дека сурутката добиена од козјо млеко се издвојува од другите. Како една од причините се наведува тоа што козите се активни животни, повеќе се движат и пасат разновидна храна. Козјата сурутка, поради своите хранливи вредности, се вбројува во т.н. суперхрана.

Таа содржи живи бактериски култури многу слични на оние што можеме да ги најдеме во обичниот јогурт и е вистински еликсир за нашите црева. Се смета за многу здрава бидејќи содржи минерали, како калиум, фосфор, натриум, бакар, цинк, магнезиум, кобалт, манган и молибден и има повисока концентрација на млечни киселини и ензими.

Козјата сурутка треба да се користи редовно, особено при често дуење на стомакот, нередовна столица и хронично воспаление на цревата. Протеините од козјата сурутка може да помогнат во губење на тежината предизвикувајќи чувство на исполнетост бидејќи влијаат на зголемување на нивото на хормони што го намалуваат апетитот.

Протеините од сурутката се исти како оние во мајчиното млеко, а меѓу нив најзастапен е алфа-лакталбумин. Тоа е бесценета белковина, која е природен извор на елементарни аминокиселини, таа го врзува калциумот и ги зајакнува коските и забите, го подобрува расположението и помага при депресивни состојби.

Сурутката исклучително здрава ја прават протеините, кои играат голема улога во зајакнување на имунолошкиот систем така што оваа суперхрана е неопходна за луѓето со слаб апетит, особено се препорачува по долго боледување или за стари лица, кои редовно треба да ја земаат.

Освен што го зајакнува имунолошкиот систем и спречува многу болести, таа е една од главните состојки во исхраната на спортистите, а се користи во производството на храна за бебиња, како и во исхраната на бремените жени од проста причина што кај нив за една третина е зголемена потребата за протеини.

Козјата сурутка се препорачува на сите оние што се под стрес поради тоа што содржи аминокиселина која произведува серотонин – хормон на среќата. Таа ги олеснува заморот и грчевите во мускулите. Уште една голема корист на протеините од сурутката е што спречува остеопороза (слабеење на коскената маса), што е карактеристично за постарите луѓе.

Едно стражување направено во Бостон, покажало дека недоволното внесување протеини во подоцнежните години доведува до значително намалување на густината на коските, особено на бедрената коска и ‘рбетот, а сурутката во прав може ова да го надополни, дури и кај лицата што се алергични на лактоза (млечен шеќер).

Козјата сурутка ги чисти крвните садови од холестерол, ги отстранува наталожените наслојки на забите, спречува крвавење на непцата и кариес, го регенерира и го штити црниот дроб. Покрај сето ова, протеините од сурутката се обработуваат директно во нашите мускули овозможувајќи многу брзо закрепнување на мускулите веднаш по тренингот.

Ја препорачуваат и диетичарите и лекарите затоа што има многу придобивки за здравјето на луѓето, а исто така се знае дека сурутката за слабеење постигнува извонредни резултати бидејќи во литар сурутка има речиси двојно помалку калории отколку што има во истото количество млеко. Секако, ако вашиот приоритет е намалување на прекумерната тежина, не е доволно само да пиете сурутка, туку да се посветите и на секојдневни физички активности.

 Козјата сурутка може да се најде во течна форма или како сурутка во прав.