Премиерот Димитар Ковачевски и министерот за земјоделство, шумарство и водостопанство Љупчо Николовски заедно со градоначалникот на Општина Центар Горан Герасимовски и директорот на Платежна агенција Никица Бачовски ги посетија учениците во Основното училиште „Ј.Х.Песталоци“ и поделија домашни македонски јаболка, за секој ученик во рамки на проектот „Здрава ужинка за секој ученик“, кој го спроведува Министерството за земјоделство, шумарство и водостопанство.
Во ОУ „Ј.Х. Песталоци“, поделени се 3.248 килограми јаболко, по четири килограми за секој ученик.
Како што соопшти владината прес-служба, на терен по основните училишта во тек е дистрибуцијата на домашни македонски јаболка, наменети за учениците, како здрава ужинка за нив.
Во општините Струга, Битола, Охрид и Прилеп 50 отсто веќе се поделени, а денес се делат и во Кочани, Куманово, Маврово и Ростуше.
Во текот на вчерашниот ден дистрибуцијата, како што е наведено во соопштението, беше направена во основните училишта низ Општина Центар и Шуто Оризари, а денеска и овие денови продолжува и низ другите општини во градот Скопје, но и другите општини низ државата.
Ова е нова програма за откуп на свежо овошје, зеленчук, млеко и млечни производи, која има неколку цели, а тоа е од една страна државата да го помогне откупот на домашните земјоделски производи, но и да се обезбеди здрава ужинка за учениците. Преку оваа програма се врши откуп на повеќе од 743.000 килограми наши домашни јаболка и согласно динамиката до 15-ти декември се очекува успешно да заврши целата дистрибуција до секое основно училиште, до секој еден ученик. -Ова година започнавме со откуп на јаболка и тие ќе бидат дистрибуирани до 350 основни училишта, односно до сите 186.000 ученици. Веќе за следната 2023 година, покрај јаболката ќе бидат опфатени и други видови на овошје, зеленчук, млеко и млечни производи, кои исто така ќе бидат дистрибуирани до основните училишта како здрава ужинка за секое дете, се наведува во соопштението. Со реализација на програмата се помага откупот на домашните земјоделски производи кои се насочуваат правилно, како здрава ужинка кон дечиња во основните училишта. Крајна цел е оваа програма да се прошири и откупените домашни земјоделски производи да може покрај во основните училишта да се дистрибуираат и до здравствените објекти, детските градинки, како и до припадниците на безбедносните сили, полицијата и армијата.
-Оваа година како прва година кога започнува програмата со реализација одвоени се 20 милиони денари. За 2023 година во Буџетот се одвоени 40 милиони денари, односно двојно повеќе од оваа година. Предвидени се средства во оваа програма за откуп на свежо овошје, зеленчук, млеко и млечни производи, што значи дека програмата ќе може да се реализира и надополнува, се вели во соопштението.
