Дождот и снегот кои интенивно паѓаа на територијата на Пијанец ќе ги освежи есенските посеви и позитивно ќе влијае врз развојот на овошните насади. Земјоделците од овој регион тврдат дека влагата која длабоко навлезе во почвата ќе биде доволна и пролетната сеидба да се реализира без проблеми.
-Дождот е корисен за пролетните посеви, а особено за прихранување на есенските култури. Засега селските водотеци се полни и ќе придонесат таа влага да се задржи. Снегот кој паѓаше во изминатите два дена ќе се задржи во повисоките места што потоа ќе придонесе за спуштање на водата во пониските делови што е мошне важно за понатамошниот развој на веќе засеаното, велат земјоделци од овој крај.
Во рамки на есенската сеидба минатата година во Пијанечкиот регион беа засеани 450 хектари обработливо земјиште, при што, како што информираа од Подрачната канцеларија на Министерството за земјоделство, шумарство и водостопанство најголем дел од засеаното е пченица која ја има на површина од 225 хектари.
-Од останатите култури 165 хектари зафаќа јачменот, 30 хектари се посеви со р’ж, додека 30 хектари се останати земјоделски култури. Очекувањата се и со пролетната сеидба бројките да бидат зголемени, истакнаа од канцеларијата на МЗШВ во Делчево.
Во наредниот период, како што додаваат земјоделците мошне важно е температурите да не бидат драстично под нулата, за да не дојде до оштетување кај овошните насади. Количината на влага која според нив ја има во почвата, повеќе од сигурно е дека добро ќе се одрази и на овошните насади кај кои наскоро започнува резидбата.
МИА
