Воведувањето повисок данок на јаглерод диоксид (СО 2) и стакленички гасови би довело до значителен колапс во производството на месо и млеко во Данска и би имало и понатамошни последици врз цените и работните места, покажале пресметките на данскиот Економски совет за околина.
Сепак, тие сè уште се залагаат за негово воведување и тоа во износ од 161,40 евра по тон произведен СО 2, пишува Top agrar. Данска си поставила цели за заштитата на климата со намалување на вкупните емисии на стакленички гасови за 70 проценти до 2030 година и да постане целосно климатски неутрална најдоцна до 2050 година..
Намалување на производството и на работните места и зголемувањето на цените на храната
Доколку се примени данокот на ова ниво, одборот очекува намалување на производството на говедско месо за дури 37 проценти, на свинското месо за 23 проценти и на млекото за 34 проценти до 2030 година во однос на досегашното ниво.
За земјоделското производство во целост, се очекува пад од околу 22 проценти. Тоа би значело и голем пораст на цените на повеќето земјоделски производи. На пример, млекото би поскапело за 14 проценти, говедското месо за 17 проценти, а свинското месо за 9 проценти.
Данските потрошувачи би морале да плаќаат значително повеќе и за зеленчукот. Доплатата се проценува на 14 проценти од сегашните цени. Покрај тоа, Советот во март признал дека данокот може да ја чини земјата 19.000 работни места. Но, тие се надеваат дека ова ќе биде компензирано со новоотворените работни места поврзани со секторите за животна средина и услужни дејности.
Сето ова би се случило поради пад на производството и пад на меѓународната конкурентност, а се проценува дека БДП ќе падне за околу 0,15 проценти.
„Најавата на климатскиот данок би ја намалила неизвесноста во врска со идните климатски политики и компаниите би можеле да ги направат потребните зелени инвестиции со поголема сигурност“, изјавил за Energy voice економскиот советник за околина, Ларс Горн Хансен.
