Министерството за земјоделство, шумарство и водостопанство кон крајот на минатата година објави јавен повик за легализација до 3 ха, мерка која земјоделците ја чекаа повеќе години.
Од Подрачната единица на МЗШВ во Кавадарци информират дека интересот за јавниот повик бр. 04/19 е голем, а се однесува за легализација на постоечки насад до 3 ха за сите култури кои се постари од 2 години.
-Од околу 400 апликации, најголемиот дел се за легализација. Но исто така има доста интерес и за повикот број 02/19 за слободна површина до 3 ха, бидејќи овој пат може да се изврши и на дел од парцела и тоа за 3, 4, 5, 6, 7 и 8 класа – вели Митко Керов, раководител на ПЕ Кавадарци.
Од Подрачната единица на МЗШВ велат дека има уште време до 22 јануари да се подготват документите за апликација.
-Посебен апел упатувам до сите земјоделци кои сеуште немаат разбрано да побрзаат до 22 јануари, за да може да извршат легализација на своите земјоделски насади. Исто така потенцирам дека нема да има проблемот околу решението од управата за јавни приходи за надмирени даноци, кои треба да го подигнат земјоделците за да ги комплетираат сите потребни документи – изјави Керов.
Сите земјоделци кои имаат дополнителни прашања или потреба од помош околу комплетирање на документите да се обратат во канцеларијата на ПЕ Кавадарци, велат од таму.
