Продолжуваат градежните активности на новиот систем за наводнување за земјоделските површини во општина Валандово. Системот е од капитален карактер за општината и ќе овозможи современ начин на наводнување и континуирано снабдување со вода за земјоделските површини во атарот на населените места Удово, Јосифово и Пирава.
Целта на системот е да придонесе за намалување на трошоците и загубите во производството, како и создавање модерно земјоделство. Со новиот систем се очекува да се обезбеди наводнување на над 2.000 хектари земјоделска површина. Ќе се зафаќа вода од Удово од реката Вардар, понатаму со главен цевковод од 8,9 километри ќе се носи до препумпни станици и ќе има дистрибутивна мрежа од 85 километри.
Завршена е 70% од дистрибутивна мрежа на системот за наводнување на Валандово, посочи Љупчо Николовски, поранешен министер за земјоделство, шумарство и водостопанство и иницијатор за капиталните инвестиции во системи за наводнување кои достигнаа над 75 милиони евра.
„Со оваа инвестиција од над 24,3 милиони евра го унапредуваме земјоделското производство и го правиме конкурентно.
Системот за наводнување е лоциран во Југоисточниот дел на општина Валандово, а составен од главна мрежа и секундарна мрежа со вкупна должина од 85 километри. Опфаќа рехабилитација на изградба на околу 750 шахти за хидрантите опремени со затворачи и водомери – за наводнување со модерни техники. Овој проект започна официјално со градба јуни 2019 година и очекуваме да заврши 6 месеци пред предвиденото.
Преку обезбедување на квалитетна и навремена вода за наводнување на земјоделските површини, овозможуваме одржливо зголемување на земјоделското производство и намалување на трошоците. Изминатите години покажавме што значи вистинска грижа за земјоделството и земјоделците. Продолжуваме да вложуваме во мерки и проекти кои обезбедуваат развој на земјоделството и подобри услови за работа на земјоделците“, истакна Николовски.
