Извозот на огревно дрво од Босна и Херцеговина е забранет на 90 дена, едногласно одлучи Советот на министри на БиХ на седницата во Сараево.
Предлогот на одлуката за привремена забрана за извоз на одредени шумски дрвни сортименти, огревно дрво и производи од дрво беше единствената точка за која се расправаше, на предлог на Министерството за надворешна трговија и економски односи.
Ресорниот министер Сташа Кошарац по седницата изјави дека одлуката предвидува привремена забрана за извоз на пелети и огревно дрво до крајот на септември, односно за период од 90 дена.
Тој посочи дека цената на пелетите е зголемена за 155 отсто во однос на лани, а извозот на пелети во првиот квартал е зголемен на 78 отсто во однос на истиот период лани.
Оваа забрана Кошарац ја побара на 10 јуни, за да го спречи очекуваниот недостиг на домашниот пазар и неконтролиран раст на цените.
Извор: МИА
