Порасна цената на црвената пиперка за ајвар и корнишоните за 10 до 20 денари. Ајварската пиперка синоќа на градскиот пазар во Штип се продаваше по цена од 30 до 45 денари, а од утринава од 40 до 60 денари.
Драган Ангелов, производител на црвена пиперка за ајвар и корнишони од село Зрновци вели дека причината за зголемувањето на цените е извозот на земјоделските производи, но и намаленото производство.
-Од утринава има нова цена, ново покачување. Синоќа ајварската пиперка беше 45 денари за килограм, а денеска се продава по цена од 50 до 60 денари за килограм. Има извоз за Косово и Украина. Целата роба оди натаму. Исто така, корнишоните минатата недела беа 50 денари, а сега се 70. Морковот 50 денари реална цена, рече Ангелов.
Тој посочува дека за зголемување на цените на земјоделските производи на градските пазари придонесуваат и цената на нафтата, ѓубре и другите репроматеријали. Свесни дека граѓаните немаат пари, ама велат ако има повеќе земјоделци ќе има повеќе производство, а со тоа и повиски цени.
-За граѓаните да имаат пониски цени треба да се врнат на село, да работат повеќе, да видат како изгледа земјоделие, вака не оди работат. Целиот терет е на нас продавачите оти ништо не можеме да направеме освен културно да измереме колку е, да не крадеме, вели Ангелов.
МИА
