Во очекување на повикот за Мерка 7 од ИПАРД, ве запознаваме со основните услови и критериуми кои треба да се исполнат за да добиете неповратен грант од 65% од вкупната инвестиција. Овој пат за Инвестиции во обезбедување на услуги во земјоделството – воспоставување и реновирање на работилници за одржување на земјоделска механизација, машини и опрема
Со мерка 7 од ИПАРД програмата како инвестиција во обезбедување на услуги во земјоделството може да се аплицира за неповратен грант од 65% за воспоставување и реновирање на работилници за одржување на земјоделска механизација. Најдобро тоа може да се прикаже со следниов пример:
Доколку барателот – правно лице со место на инвестиција во Новаци сака да започне да се занимава односно да инвестира во реконструкција и опремување на објект – работилница за одржување на земјоделска механизација. Вкупната вредност на инвестицијата треба да биде од 1.500 евра до најмногу 1.000.000 евра. Во нашиов пример претпоставуваме дека вкупната инвестиција изнесува 30.000 евра.
Документи кои се потребни при набавката на оваа опрема се:
- Целосно пополнето барање за користење на средства (кое ќе ви помогне да го пополните консултантска куќа или сами)
- Фотокопија од важечка лична карта или пасош на одговорното лице
- Диплома или сертификат за завршен курс/обука за извршување на занаетчиски работи – поправка на механизација
- Доказ дека правното лице не е во постапка на стечај
- Доказ дека правното лице не е во постапка на ликвидација
- Доказ дека на барателот не му е изречена прекршочна санкција забрана за вршење професија, дејност или должност
- Изјава за големина на субјект (консултантска куќа)
- Потврда дека едно одговорно лице е во редовен работен однос во правното лице од АВРМ
- Уверение за платени даноци и придонеси од УЈП
- Потврда од локалната самоуправа – Општината Новаци, дека инвестицијата е во согласност со стратегијата за локален економски развој
- Имотен лист од објектот каде ќе се врши дејноста и ќе се реконструира
- Поднесено барање за издавање елаборат за заштита на животната средина
- Една понуда од добавувач (од каде се планира да се земе опремата) до 10.000 евра со детална спецификација и изјава за земја на потекло, или 3 понуди од различни добавувачи доколку издадената понуда е поголема од 10.000 евра, придружена со терхничка спецификација и изјава за земја на потекло. Опремата која се набавува мора да биде нова и неупотребувана.
- Копии од лиценца за градба за релевантната категорија
- Договор за општи трошоци
- Фактура за платени општи трошоци
- Понуда за општи трошоци
- Одобрение за реконструкција на постоечки објект
- Копии или електронска форма ЦД од основните технички цртежи и премер пресметка од ревидирана техничка документација
- Времена ситуација/ состојба за сите завршени градежни работи
- Технички предлог проект (консултантска куќа)
- Доказ дека правното лице е регистрирано за вршење на занаетчиска дејност – Централен регистар
Целокупната документација се става во затворен плик и се испраќа до:
Агенција за финансиска поддршка во земјоделството и руралниот развој
ул. 3-та Македонска Бригада бр. 20
зграда на Македонија Табак блок Ц
1000 Скопје
со назнака “Не отворај” по јавен оглас бр. __ и мерката за која се бараат средства.
По разгледувањето на барањето од страна на АФПЗРР и конечно одобрување на бараните средства барателот потпишува договор со АФПЗРР за реализација на инвестицијата и од овој момент може да се почне со реконструкцијата на објектот и купување на опремата т.е. со сопствени средства може да ја набави опремата која треба да се плати преку банка со повикување по број на фактура на образец ПП30 (црвен).
После реализацијата односно од кога ќе биде отворена работилницата во нашиот случај се поднесува барање за исплата и средствата кои се инвестирале се враќаат 65% односно доколку инвестицијата изнесувала 30.000 евра, средства кои ќе му бидат доделени на барателот се 19.500 евра кои преставуваат неповратен грант. Барателот е должен оваа инвестиција да ја чува и да не ја отуѓува во наредните 5 години.
