Инсектот кој ја пренесува болеста на цитрусите се појавил во шпанскиот град Севиља каде што најмногу ги загрозува стеблата на портокалите. Портокалите сочинуваат 25 отсто од градските дрвја и од нивните плодови се произведува карактеристичен мармалад.
Неопходно е градот да преземе мерки за превентивно да ги заштити своите 48.000 портокали од смртоносните бактерии кои веќе ги уништија плантажите со цитруси во Азија, Латинска Америка и САД, пишува Гардијан. Се проценува дека појавата на оваа болест би чинела околу 20 милиони евра, кои би требало да се потрошат за уништување и замена на зафатените стебла.
Кампања за спас на цитрусите
Европската Унија го започна проектот „Живот за цитрусите“, а во него се вклучени Шпанија, Португалија, Франција и Италија. Целта е да се создаде стратегија за запирање на ширењето на „huanglongbing HLB“, болеста на зазеленување на плодовите на ова овошје, исто така наречена болест „жолт змеј“.
Болеста е предизвикана од бактеријата Candidatus liberibacter која ја пренесуваат инсекти и може целосно да го уништи стеблото во рок од пет години.
Откриена е во Кина во 1943 година, во Африка во 1947 година, а до 2005 година почна да пустоши насади со портокали на Флорида. Инфекцијата достигна ниво на епидемија во 48 азиски земји и 53 африкански држави, како и во Бразил и САД. Се очекува во Европа, бидејќи е присутен инсектот кој ја пренесува оваа бактерија.
Инсектот Trioza eryteae или африканскиот цитрусен псилид е присутен на Канарските Острови, во Португалија и Галиција во северозападниот дел на Шпанија.
„Проблемот е во тоа што кога ќе стигне векторот, порано или подоцна пристигнува и болеста“, рече Франциско Аренас, раководител на Институтот за истражување „Лас Торес“ во Андалусија, Јужна Шпанија.
Симптоми на болеста и борба против болеста
Првиот знак на болеста е појавата на пожолтени и деформации. Заразеното растение има помал принос и се распаѓа во период од пет години. Не постои начин да се искорени болеста. Може да се преземат превентивни мерки или дрвјата да се уништат и да се заменат со нови.
Градскиот совет на Севиља и кампањата започнаа пилот програма за поттикнување на ширењето на инсектите и птиците, кои се природни непријатели на пренесувачот на бактеријата. Неопходно е да се работи со природата, а не против неа.
Во паркот Бухаира во Севиља, ќе се засади плантажа со портокали на површина од 1.800 квадратни метри со различни покривни видови, а ќе се постават и „хотели“ за бубачки и кутии за птичји гнезда за да се поттикне екосистемот сам да го спречи ширењето на инсектите пренесувачи и појава на болести. Видот Tamarixia dryi, кој ги лови ларвите на Trioza, ќе биде воведен во областа, бидејќи тие немаат автохтони непријатели.
Педро Торент Чокаро од Севилското одделение за паркови и градини изјави дека инсектите пуштени во Галиција дале добри резултати, а се планира во догледно време да бидат пуштени и во Португалија и Андалузија.
Напишете коментар