Зголемен квалитет и продуктивност, намалување на трошоци, без ослободување на штетни гасови од гориво преку автоматизирање на повторувачки операции при обработка на почвата, се само дел од бројните придобивки на користење роботи во земјоделството, за кои македонските одгледувачи на лозје имаа прилика да научат повеќе за време на демонстрацијата на управување со универзалниот земјоделски робот – AgAR, која вчера се одржа во Винарија Камник – Скопје.
Универзалниот земјоделски робот – AgAR е дизајниран да може да ги извршува речиси сите земјоделски работи, почнувајќи од орање, садење, кроење, мулчирање, прскање, наводнување, па сѐ до берба. Целосно компатибилен со стандардна приклучна земјоделска механизација, опремен со софтвер за далечинско управување, движење по предодреден пат и автономна навигација со сензори за избегнување на пречки, роботот претставува идеален земјоделски помошник.
Роботот AgAR базиран на вештачка интелигенција е проект меѓу српската компанија COMING – Computer Engineering и Машинскиот Факултет при Универзитетот во Ниш. Ова е одличен модел кој покажува како академијата и индустријата можат ефективно да соработуваат. AgAR има за цел да го зголеми производството и да ги намали оперативните трошоци, насочувајќи се кон средни и поголеми производители. Прецизната работа ги зачувува ресурсите како вода и пестициди, намалувајќи го штетното влијание врз животната средина и промовирајќи одржливост.
Покрај роботот, на настанот беше презентирана и Winessense платформата за управување со лозови насади, која со помош на напредни сензори поставени низ лозјата, прибира информации за состојбата на почвата, здравјето на лозата, временските услови и активноста на штетниците.
Настанот наиде на одличен прием кај бројните учесници, претставници на винариите, поголеми производители на грозје, претставници на факултетите за земјоделство и институтот за лозарство и винарство кои покажаа голема подготвеност и ентузијазам за примена на новите технологии и науката во одгледување на виновата лоза во државата.
Демонстрацијата беше овозможена и фасилитирана од Швајцарската Програма за зголемување на пазарната вработливост – ИМЕ, во насока на унапредување на процесот на дигитализација и модернизирање на секторот одржлив агрибизнис.
