Дека туризмот во хрватска претставува важна стопанска гранка се покажа и во Осјечко –барањската општина со потпишувањето на договори за поддршка на континенталниот туризам. Биле потпишани договори со 29 семејни земјоделски стопанства и селски домаќинства кои нудат сместувачки услуги во овој регион.
Станува збор за деловни субјекти кои до сега не биле опфатени со некоја државна мерка за надминување на последиците од епидемијата со корона вирусот, а бидејќи туризмот е една од најзагрозените стопански гранки, општината им одобри финансиска поддршка од својот буџет.
Поддршката изнесува до 5000 куни за секој сместувачки капацитет во индивидуалното семејно земјоделско стопанство или селско домаќинство.
“За ова поддршка почнавме да се подготвуваме уште на почетокот на годината кога веќе беше јасно дека пандемијата ќе направи огромни проблеми во стопанството, земјоделството и туризмот. Најпрво ја чекавме државната помош, за да можат парите да стигнат во вистински раце.“ изјави тамошниот жупан Иван Анушиќ, појаснувајќи дека всушност се работи за вкупна сума од 1,06 милиони куни наменети за сместувачките капацитети кои го одржуваат жив континенталниот туризам.
Директорката на општинскиот Управен оддел за туризам, култура и спорт Татјана Рот, истакна дека за овој тип на поддршка обезбедени се 1,7 милиони куни но засега од страна на семејните земјоделски стопанства се покажа дека има потреба за искористување на 1,06 милиони куни. Услов за користење на поддршката беше намален приход за 30% во јуни оваа година, во споредба со јуни минатата година, што значи дека дел од семејните земјоделски стопанства сепак добро работеле. Моментално се реализирани 55% од ноќевањата кои биле реализирани во истиот период од минатата година.
Една од корисничките на оваа поддршка е и Николина Шариќ , сопственичка на селското домаќинство „Ана“ која рече дека оваа година имале намалување на прометот дури за 93% во однос на минатата.
„Во јуни минатата година имавме 58 ноќевања, а годинава само шест. Оваа поддршка ќе ни помогне да истраеме и да се надеваме на подобра наредна сезона. Не ни падна на ум да го затвориме домаќинството, особено затоа што Барања има предиспозиција да стане најдобра континентална туристичка дестинација“, заклучи таа оптимистички.
Извор: Агроклуб
