Глобалните цени на прехранбените производи во август се во тренд на раст после два континуирани месеци пад, водени со силен скок на меѓународните котации на шеќер, пченица и растителни масла, објави Организацијата за храна и земјоделство на Обединатите нации (ФАО).
ФАО индексот на цената на храната, кој ги следи месечните промени во потрошувачката кошница од пет основни прехранбени производи – млеко, месо, житарки, шеќер и растителни масла – во август изнесуваше во просек 127,4 поени, што е раст од 3,1 отсто во однос на јули и за дури 32,9 отсто во однос на истиот месец во 2020 година.
Цените на шеќерот пораснаа за 9,6 отсто во август во однос на јули, поради загриженоста поради штетите кои мразот ги нанесе на посевите во Бразил, најголемиот светски извозник на шеќер. Растот на цената на оваа намирница ја ограничи информацијата за добри производствени изгледи во Индија и Европската Унија, како и пад на цената на суровата нафта и ослабнувањето на бразилската валута, реалот, се наведува во извештајот објавен на веб-сајтот на ФАО.
Растителните масла на меѓународниот пазар поскапеа во август за 6,7 проценти, при што цените на палминото масло се вратија на историскиот максимум поради континуираното потфрлање во однос на производствениот потенцијал, што резултираше со намалување на залихите во Малезија. Цените на маслодајната репка и сончогледово масло исто така пораснаа.
Цената на житарките во август се зголемени за 3,4 отсто во однос на претходниот месец. Котацијата на пченицата забележа скок од 8,8 проценти поради предвидената послаба жетва во неколку големи земји извознички. Спротивно на тоа, цената на пченката падна за 0,9 посто, поради подобрите изгледи за род во Аргентина, ЕУ и Украина, со што се неутрализирани намалените прогнози за производство во Бразил и САД. Глобалните цени на ориз останаа на надолна патека.
Меѓународните цени на месото благо се зацврстија во тековниот месец, поддржани со силни кинески купувања на овчо и говедско месо и солидна увозна побарувачка во Источна Азија и на Блискиот Исток за живинско месо. Цените на свинското месо паднаа, покрај понатамошното намалување на побарувачката во Кина и послабата домашна побарувачка во Европа.
ФАО – индексот на цената на млекото благо опадна во август на месечно ниво, покрај падот на котацијата на млекото во прав поради слабата глобална увозна побарувачка и сезонски раст на извозните можности во Океанија, што го компензира порастот на цените на сирењето.
Во издвоениот извештај на пазарот на житарки, ФАО ја намали проценката на производство на жито во оваа година за еден процент на 2,78 милијарди тони. Исто така предвидува дека глобалното производство на пченица оваа година ќе биде помала за 0,7 проценти и дека ќе изнесува 769,5 милиони тони, главно поради негативните последици од продолжената суша во Северна Америка и неповолните временски прилики во Казахстан и Руската Федерација, земји кои се големи производители на лебно зрно.
