Холандската влада го претстави планот вреден 25 милијарди евра со кој треба радикално да се намали бројот на добиток во земјата.
За договорот за откуп на добитокот од фармерите, за да се обидат да се намалат нивоата на загаденост со азот, се расправа веќе подолго време, а конечно беше потврден по договорот на новата коалициска влада во Холандија претходно оваа недела. Тринаесетгодишниот план вреден 25 милијарди евра, вклучува плаќање на некои холандски сточари да се преселат или да ја напуштат индустријата и да им се помогне на другите да се префрлат на методите на органско земјоделство, со помалку животни и повеќе земја.
Планот, прв од ваков вид во светот, наиде на жестоки реакции кај земјоделците кои во последните години организираа големи улични протести. Стравуваат од трајно оштетување на производството на храна во земјава ако премногу земјоделци бидат принудени да се откажат од својата работа.
-Не сакаме системот да колабира. Јас сум сопственик на земјиште, па критично прашање е дали владата може да ги избрка земјоделците од земјата. Хаг не може да им каже на земјоделците дека мора да заминат, потребен ни е договор – рече фармерката Марија Клевер од холандскиот сојуз на млади фармери.
Иако меѓународно е пофалена како „мала земја што го храни светот“ и најголем извозник на месо на континентот, Холандија се бори со кризата со загадувањето предизвикана од вишокот домашни животни.
„Не можеме да бидеме мала земја што го храни светот ако при тоа сами се загадуваме и уништуваме“, рече Тјерд де Грот од партијата Демократи 66, која е дел од коалициската влада во Холандија.
Земјата има најголема густина на стока во Европа – повеќе од четирипати поголема од онаа на Велика Британија или Франција – со вкупно повеќе од 100 милиони говеда, кокошки и свињи.
Животните произведуваат ѓубриво кое, кога се меша со урината, ослободува амонијак, азотно соединение. Ако дојде до езерата и потоците преку истекување од фармите, прекумерните количини на азот може да ги оштетат чувствителните природни живеалишта.
Највисокиот холандски управен суд во 2019 година утврди дека владата ги прекршува законите на ЕУ со тоа што не прави доволно за да го намали вишокот на азот во ранливите природни области, поради земјоделските и индустриските активности.
Планот ќе започне како доброволна програма, со понудена компензација на сточарите. Крајниот резултат се очекува да биде блиску до една третина намалување на бројот на свињи, крави и кокошки во земјата.
„Не мораме да го храниме светот, но би можеле да покажеме како да се направи тоа на поодржлив начин“, рече фармерот за органски млечни производи Јаринг Брунија.
Но, лидерите на земјоделските здруженија рекоа дека ќе го прифатат планот само доколку сточарите сами одлучат за тоа и при тоа бараат повеќе време за намалување на емисиите кои мислат да ги постигнат благодарение на технолошките иновации.
Европскиот парламент ја нагласува важноста за поддршка и помош на земјоделците во преминот кон поодржливо земјоделство преку обезбедување соодветни советодавни обуки, стимулации и финансиски програми за поддршка на нивниот животен стандард и конкурентност во руралните области преку промовирање инвестиции и организација во синџирот на исхрана, зајакнување на малите локални фармери и поддршка на кратките синџири на снабдување.
