Глобалното производство на вино и годинава ќе остане под просекот од последните пет години. Намалувањето е како последица на малите количини од Јужна Америка и ограничувањата во земјите од Европската унија откако кризата со коронавирусите ја намали продажбата, соопшти Меѓународната организација на вино и лозарство (ОИВ).
Во првичните проценки за 2020 година, светското производство годинава е ограничено помеѓу 253,9 и 262,2 милиони хектолитри, со просечна прогноза од 258 милиони хл.
Помалку вино поради пандемијата
Ова е втора година по ред како глобалното производство на овој пијалок останува под просекот, откако во 2018 година се искачи на речиси рекордно високо ниво, соопшти оваа организација со седиште во Париз.
Да потсетиме, дека во 2019 година производството се намали на 260 милиони хектолитри, што претставува намалување за 35 милиони хектолитри, или за 11,5% помалку во споредба со рекордната 2018 година.
” Ова не мора да се смета за лоша вест за винскиот сектор, со оглед на сегашниот контекст каде геополитичките тензии, климатските промени и пандемијата Ковид-19 генерираат висок степен на нестабилност и несигурност на глобалниот пазар “, велат од ОИВ.
Лозарите од ЕУ имаа корист од добрите временски услови, но производството останува под просекот бидејќи производителите на вино и владите на земјите членки го ограничија, со цел да се намали негативното влијание на пандемијата. На пример, во Франција, производителите на шампањ се согласија да ја намалат бербата на грозјето за 20%, бидејќи се обидуваат да се опорават од падот на продажбата предизвикана од кризата предизвикана од корона вирусот.
ОИВ очекува земјите на ЕУ, во кои спаѓаат трите најголеми светски вински сили, Италија, Франција и Шпанија, да произведат 159 милиони тони, што е за 5% повеќе од 2019 година, но сепак е под просекот.
Зголемување има, во споредба со 2019 година во земји како што е Германија за 8%, Унгарија за 22% и Австрија за 10%, додека во земјите како што се Романија и Грција забележано е намалување за 7 и 2%.
Се проценува дека на јужната хемисфера вкупното производство на вино ќе бележи пад од 8% во однос на минатата година и тоа на 49 милиони хектолитри, воглавно благодарејќи на наглиот пад во Аргентина за 17%, Чиле 13 % и Австралија за 11%.
Во САД, според прелиминарните проценки производството на вино ќе изнесува 24,7 милиони хектолитри што е за 1% повеќе од 2019 година, но прогнозата би можела да се ревидира во наредните месеци поради дополнителните информации за последиците од пожарите во Напа и Сонома.
Извор: Агроклуб
