Француската влада ги повика луѓето кои во моментот се без работа да им помогнат на земјоделците и фармерите додека трае кризата предизвикана од коронавирусот.
Министерот за земјоделство на Франција, Дидие Гијом, го упати овој апел до сите работоспособни Французи „да и се придружат на армијата француски земјоделци“. Според него, 730.000 работници се во „делумна невработеност“ откако компаниите презедоа мерки за справување со економската штета која ја предизвикува Ковид-19. Многу од овие луѓе сега може да им помогнат на земјоделците за да се обезбеди непрекинато производство на храна за времетраењето на кризата.
Министерот додаде дека има речиси 200.000 отворени работни места во земјоделскиот сектор кој често зависи од ангажирање привремени работници од странство.
Апелот доаѓа по најавите на премиерот Едуард Филипе за дополнителни рестрикции во Франција, кои вклучуваат затворање на сите пазари освен ако тие не се примарниот извор на храна за тоа подрачје. Министерот за економија Бруно ЛеМер ги повика супермаркетите да набавуваат производи од француски земјоделци и фармери кои се погодени од затворањето на пазарите, а продавниците да набавуваат овошје, зеленчук, месо и риба со потекло од Франција. ЛеМер ова го нарече „економски патриотизам“.
