Франција месецов распиша тендер за набавка на 80 милиони дози од вакцината против птичји грип со цел наесен да биде подготвена да започне со програмата за вакцинација. Тоа е првата земја во Европската Унија која се реши на овој чекор.
Владата на Франција планира превентивно да ја вакцинира најекспонираната живина, да го ограничи размножувањето на вирусот и ризикот од мутација и да избегне пренесување на цицачи и на луѓе. Презентирани се три сценарија за кампања.
Првиот вклучува зачувување на генетскиот потенцијал за да се обезбеди селекција и размножување, а тука бројот на потребните вакцини е ограничен. Втората опција се однесува на патки кои се користат за правење специјалитети од црн дроб, познатиот „foie gras“, но и мисирки, патки и кокошки во слободно одгледување. Трета опција е да се вакцинираат кокошки, мисирки, гуски и друга живина одгледувана на отворено.
Ниту едното сценарио не вклучува вакцинирање на бројлерите, кои го сочинуваат најголемиот дел од живината во Франција, бидејќи се смета дека постои релативно низок ризик од заразување со вирусот.
