Денеска во Гевгелија тимот за управување со ИПАРД програмата при Министерството за земјоделство, шумарство и водостопанство во соработка со Платежната агенција на финансиска поддршка на земјоделството и руралниот развој во Македонија организираа и спроведоа презентација на „Мерката 1 и 7“ од ИПАРД 3.
Европскиот фонд за руралниот развој на членките кандидатки, како што е Македонија, годинава одобри грант (неповратни средства) од 97 милиони евра за развој на земјоделството и земјоделските стопанства, сточарството и сточарските стопанства во Македонија, како и сегментите од производните можности во руралните средини за осовременување и заживување на руралниот развој во нашата земја.
Финансиската поддршка од 97 милиони евра ќе тече и трае до 2027 година, а првиот повик за аплицирање е објавен на 1 септември годинава. Од МЗШВ и тимот за управување со ИПАРД програмата за Македонија почнаа со реализација на „ИПАРД теренски инфо денови“ наменета за земјоделците и правните лица кои се од областа на земјоделската дејност, производството и иматели на имот во рурална средина кои се во можност деловно да го активираат.
Утврдено е дека крајниот рок за апликација до 15 октомври е краток, па со одлука на Владата на РСМ рокот е продолжен за дополнителни 15 дена, се до 30 октомври 2023 година.
Право да конкурираат имаат самостојните земјоделци кои имаат свое сопствено производство, индивидуални задруги, или други правни лица, регистрирани во единствениот регистар на земјоделско стопанство, т.н.„фарм регистар“. Апликантот индивидуалец треба да има најмалку средно образование, или Сертификат за неформално образование за производство на одредена земјоделска култура. За апликантт правно лице мора да има најмалку еден вработен во фирмата, со петгодишно работно искуство, а истата да има соработка со МЗШВ и да имале остварено субвенции најмалку три години, што е показател за сериозност во работењето.
Финансиската поддршка е со неповратни средства од фондот на ИПАРД во однос 60% грант, 40% сопствени средства. Грант значи дека добиените финансиски средства од европската помош не се кредит кој треба да го враќате, туку се неповратен влог на ЕУ во вашиот бизнис.
Минималната вредност на еден грант е 20.000 евра, а максималната 750.000 евра. Значи, проектот со кој се конкурира за ИПАРД -3 подршка не може да изнесува помалку од 33.333,- евра, во вкупен износ. Ако имате понудено проект со помала вредност, на пример 33.000 евра ќе бидете одбиени.
За да користите максимален износ на грант од 750.000 евра, треба да понудите проект во вкупна вредност од 1.250.000 евра.
Граѓаните од Гевгелија, Богданци, Дојран кои учествуваа на пренетацијата имаа свои прашања:
– „Како да набават трактор и колку понуди од добавувачи треба да понудат во апликацијата?“
Одговор: најмалку три понуди, а понудите да имаат исти технички карактеристики за опремата и да бидат ЕУРО 5.
– „Дали може странска фирма која работи во Македонија да биде апликант за ИПАРД 3“? – Стручните лица од МЗШВ одговорија „Може“.
– „Дали може да се користи аванс при почетокот на изведбата на инвестицијата за која склучиле договор со ИПАРД програмата на МЗШВ?“
Одговорот е ДА. Вредноста на авансот е 50% од одобрениот грант за проектот, а за авансот треба да се приложи банкарска гаранција во однос од 110% од вредноста на авансот. Барање за аванс се поднесува во рок од 60 дена по потпишувањето на договорот со ИПАРД 3.
За други отворени прашања Агенцијата за финансиска поддршка во земјоделството и руралниот развој остануваат отворени за сите заинтересирани, кои можат да ја користат веб адресата на Министерството www.ipardpa.gov.mk
Извор: gevgelijanet.com
