Стартап тимот Farmbot од Нови Сад направил специјален ровер, робот возилото „Спасоје“ на далечински управувач со GPS навигација за одржување на овошни насади, лозја и зелени површини, особено оние на стрмни падини, како и за поедноставување и намалување на трошоците за работа за земјоделските производители.
На натпреварот за најдобра технолошка иновација во Србија за „Soter Rover“ ја освоија третата награда. Нивниот робот користи алатки за косење, прскање, орање, чистење на снегот, а може да влече и приколки со товар од 800 килограми, стои на веб-страницата на Стопанската комора на Србија.
„Нашата мисија е да им ја олесниме работата на земјоделците на тешки терени и да им овозможиме на луѓето да останат и да се вратат на земјата со помош на новата технологија“, изјави Никола Лукичиќ, директор на Farmbot, компанија која се занимава со технолошки развој на роботиката во земјоделството.
Во компанијата оваа иновативна машина ја нарекуваат „Спасоје“. Идејата се родила на падините на Фрушка Гора, каде што Никола и неговиот колега од тимот на Farmbot, Бранислав Весковиќ, одгледуваат органска лаванда.
Во разговор со локалните винари и овоштари, сфатиле дека недостатокот на работна сила е голем проблем. Исто така, работата на класичните земјоделски машини на стрмен терен е многу отежната и постои реален ризик да се превртат тракторите поради наклонетост на теренот.
„Постои специфичен ризик од превртување на овоштарските трактори на стрмен терен при косење, орање и прскање на насадите. Така се роди идејата за автоматизирање на овие процеси, што придонесува за одржлив развој на земјоделството“, вели Никола за српските медиуми.
Тој наведува дека им се потребни нови инвестиции за развој на нови модели на роботи кои ќе имаат уште повисоки перформанси и ќе користат алатки за трактори, а со тоа целосно ќе ја заменат употребата на овој тип на овоштарски трактори.
Првиот прототип на роверот бил создаден во средината на 2019 година. Оттогаш, тие постојано ја подобруваат технологијата што ја тестираат на терен во сите временски услови.
Следниот месец „Спасоје“ ќе излезе на пазарот и заинтересираните земјоделци конечно ќе можат да ја изнајмат или купат оваа повеќенаменска машина.
